Holland və yapon futbolçular “Xəzər Lənkəran”ın düşərgəsində

Avstriyanın Kirxdorf şəhərciyində təlim-məşq toplanışını davam etdirən "Xəzər Lənkəran" klubu gündə iki dəfə olmaqla hazırlıq keçir.

Korner.az-ın klubun rəsmi saytına istinadən verdiyi məlumata görə, məşqçilər korpusu əsasən futbolçuları fiziki planda hazırlmaq yönündə çalışmalar üzərində işləyir.

Hazırda komandanın düşərgəsində baxışda olan iki futbolçu var ki, bunlar Latviyanın "Gulbene" klubunda çıxış edən yapon futbolçu Saito Yosuke və Hollandiya Erediviziyasından "Ekselsior"un forvardı Yason Oostdur. Hər iki futbolçu haqqında məşqçilər korpusu bir neçə gündən sonra dəqiq qərar verəcək.

Bu gün isə Azərbaycan millisinin toplanışında olduğu üçün qısa müddətli istirahət verilmiş üç futbolçu – Kamran Ağayev, Elnur Allahverdiyev və Rahid Əmirquliyevdə Avstriyaya yola düşəcək.