Topaz Premyer Liqasının VIII turunun son oyununda “Zirə” öz meydanında “Neftçi”ni qəbul edib.
Korner.az-ın məlumatına görə, oyun qonaqların 0:2 hesablı məğlubiyyəti ilə başa çatıb.
Oyundan sonra “Neftçi”nin baş məşqçisi Elxan Abdullayev oyun haqda fikirlərini bölüşüb:
“Rəqibi təbrik edirəm. Layiqli qələbə qazandılar. Bizdən üstün idilər. Bizim oyunumuza gəlincə, müdafiədə kobud səhvlərə yol vermişik. İkinci hissədə də qırmızı vərəqə almağımız oyunu pozdu. Hər oyunda müdafiə rəqibə hədiyyə verir. Biz bunun üzərində işləyirik. Amma bu fərdi səhvlərdi. Təcrübəli futbolçu elə səhvə yol verməz. Səviyyəli futbolçu o səhvi etməz. Onsuz da “Zirə” üstün idi. İşləmək lazımdı, nağıl danışmağım yersizdi. Heç kimi qovmaq fikrim yoxdu. Bu futbolçular var və onlarla işləmək lazımdı.
Hər futbolçuda səhv ola bilər. Bizdə daha çoxdu. Biz razılaşırıq ki, zəifik. “Neftçi”dən bir şey qalmayıb. Transfer üçün qışı gözləyirik. Qarşıdaki oyunlara hazırlaşmaq lazımdı. Bəzi epizodlar xoşuma gəlib. Əlbəttə, biz "Qarabağ"la oyunda belə səhvlərə yol verə bilmərik. Bugünkü kimi oynasaq, böyük problemlər olacaq”
