“Qarabağ”ın futbolçusu Bədavi Hüseynov “Zirə” ilə oyundan sonra Korner.az-a müsahibə verib.
Çətin oyun oldu. Rəqib çox güclü komandadı. Turnir cədvəlinin ikinci pilləsindədir. Bilirdik ki, bizə qələbə lazımdır. Çox istəyirdik istədiyimiz nəticəni qazanaq. Yaxşı oynamağa çalışdıq. Rəqibin heyətində güclü futbolçular var. Onların arasında Bonilla çempionatın bombardirləri sırasındadır. Buna baxmayaraq Bonillanı zərərsizləşdirib istədiyimiz nəticəni qazandıq.
– Yəqin ki, qalan oyunlarda ehtiyat oyunçular oynayacaq, siz isə istirahət edəcəksiz, yoxsa…?
– Mən belə düşünürəm ki, arxayınlaşmaq olmaz. Ona görə ki, qarşıda bizi kubok oyunu gözləyir. Keçən ilki uğuru təkrarlamaq istəyirik. Yəqinki az oynayan oyunçulara daha çox şans veriləcək. Hal hazırda yarımfinalın cavab oyununa hazırlaşırıq və dubl etmək istəyirik.
– Bu ilki çempionluğunuzun keçən ilkindən hansısa cəhətdən fərqi oldumu?
– Hər mövsüm çempion olmaq daha da çətinləşir. Hər mövsümün çempionu olmaq məsuliyyətimizi artırır. Ona görə də çempionluğu qorumaq çətin olur. Hər mövsümdə rəqiblər bizə xüsusi, ikiqat motivasiya ilə hazırlaşırlar. Amma o fikirlə razıyam ki, bu dəfəki çempionluğumuz əvvəlkilərdən bir qədər asan oldu. Bunda da maddi böhranın rolu oldu. Bunun nəticəsində həm çempionat, həm də digər komandalar elə də güclü olmadı.
– Bundan öncəki 2 ildə çempionluğunuzun rəsmiləşdiyi oyundan sonra komanda da çempionluq ab-havası yaşanmışdı, amma bu il sanki darıxdırıcı oldu…
– Mən belə deməzdim. Çempionluqu oyundan dərhal sonra paltardəyişmə otağında qeyd etdik. Nə bilim, bəlkədə əsas bayram ab-havasını kuboka saxlamışıq.
– Bu il “Qarabağ”ı axırki Çempionlar Liqasının qrup mərhələsində görə biləcəyikmi?
– Əlbəttə, hər kəs bizdən bunu istəyir. Klub rəhbərliyi də bizə arxadır. Həmişə nə lazımdırsa, edirlər. Bizə də hər şeyin sabit olmağında onların xidməti böyükdür. Bilirik ki, hamı bizdən Çempionlar Liqasının qrup mərhələsini gözləyir. Bunu yaxşı başa düşürük və məqsədimizə nail olmaq istəyirik. Amma nəzərə almalıyıq ki, bu turnirdə çıxış edən komandalar çox güclüdürlər. Çempionatda olduğu kimi sıradan rəqiblər olmayacaq. Buna görə də çox ciddi hazırlaşmalıyıq. Çempionlar Liqasının qrupuna düşmək üçün bizdən asılı olan hər şeyi etməyə çalışacağıq. Çempionluğa o dərəcədə sevinmədik. Çünki qarşıda ölkə kuboku da var. Sevincimizi o vaxta saxlamışıq. İndi daha çox “qızıl dubl” etmək haqda düşünürük.
