Fransa Futbol Federasiyasının Apelyasiya Komitəsi Peşəkar Klublara Nəzarət Komissiyasının (DNCG) “Lans” klubuna mövsümün sonunadək futbolçu transferini qadağan etməsi bağlı qərarını ləğv edib.
Korner.az-ın Fransa mətbuatına istinadən yaydığı xəbərə görə, azərbaycanlı iş adamı Hafiz Məmmədovun sahibi olduğu kluba qış transfer pəncərəsi bitənə – yanvarın 31-nə kimi yeni futbolçu almağa icazə verilib.
Xatırladaq ki, DNCG Fransa klubunun hesabına köçürülən vəsaitin bank sübutunun olmamasını əsas gətirərək bəla qərar vermişdi. Məmmədov ötən ilin iyulunda “Lans”a sahib olarkən, kluba ilkin mərhələdə 5 milyon avro, 2013-cü ilin iyunun 30-dək isə 6 milyon avro köçürməli idi. Amma klub 6 milyon avronu fevraldan etibarən köçürülməyə başlanmasını, DNCG isə bu ödəmələrə zəmanət verilməsini xahiş etmişdi.
“Sarı-qırmızılar”ın köçürmələrin bank sübutlarını Fransa Futbol Federasiyasına təqdim etməsindən sonra DNCG-nin qərarı ləğv olunub.
