Futbol mütəxəssisi Böyükağa Hacıyev bu gün “Lider TV”də verilişlərin birində qonaq olub.
Korner.az xəbər verir ki, təcrübəli mütəxəssis iki komandanın Avro Liqanın qrupunda mübarizə aparmasını futbolumuzun inkişafı ilə əlaqələndirib:
“Hər iki komandaya uğurlar arzulayıram. Bu gün Allah onları azarkeşlərimizin yanında başıaşağı etməsin. Doğrudan da, biz bu iki matçı səbrsizliklə gözləyirik. Bu gün birdən-birə iki komandanın Avropa Liqasında ölkəmizi təmsil etməsi futbolumuzun inkişafından xəbər verir. Çoxları deyə bilər ki, futbolda inkişaf yoxdur. Ancaq iki komandanın qrup mərhələsində çıxış etməsi futbolumuzun inkişafı deməkdir”
Təcrübəli mütəxəssis daha sonra Avro Liqada ölkəmizi təmsil edən “Qarabağ” və “Qəbələ”nin şanslarını dəyərləndirib:
“Borussiya”dan bir neçə əsas heyət futbolçusu “Qəbələ”yə qarşı oynamayacaq. Ancaq bu o demək deyil ki, “Borussiya” əl-qolunu sallayıb gedəcək. “Qəbələ”ni çox ağır oyun gözləyir. Fikrimcə, “Qarabağ”ın şansı daha çoxdur. “Qarabağ” komplektləşdirilmiş bir komandadır. Futbolçuları bir-birlərini əzbər tanıyırlar. Ona görə də “Qarabağ”ın qələbəsi daha inandırıcıdır. “Qəbələ”nin oynadığı heyət çox ağırdır. Baş məşqçi dəyişkliyi komandada özünü doğruldub. Dortmund “Borussiya”sı son oyunlarda elə də pis oynamır. Çox istərdim ki, bu gün “Qəbələ”nin heyətində ən azı bir azərbaycanlı futbolçu oynasın. “Qəbələ” bu gün evdə oynadığı üçün açıq futbol nümayiş etdirmək məcburiyyətindədir. Tək müdafiəyə qapanmaq olmaz. “Qəbələ” ilk dəqiqələrdən üstünlüyü ələ almalıdır və çalışdırmalıdı ki, qol vursun. ”Qarabağ” “Tottenhem”ə məğlub olduqdan sonra evdə “Anderlext”i məğlub etdi. Bu komanda hər an sürpriz edə bilər. Reynaldonun oynamamasına baxmayaraq, onu layiqincə əvəzləyəcək futbolçular var. Açığı, son vaxtlar Reynaldo öz oyununu nümayiş etdirmirdi. Bəlkə də, Reynaldonun istirahətə ehtiyacı var idi və getdi istirahətə. Mən inanıram ki, Qurban Qurbanov öz dəstəsini yığacaq və azərbaycanlı futbol azarkeşlərinə sürpriz edəcək. “Qarabağ”dan qələbə gözləyirəm. “Qəbələ” isə Avro Liqada yeni komandadır. Yetərincə təcrübəsi yoxdur. Təzə oyunçular heyətdə çoxdur. Bu futbolçuların komandaya uyğunlaşması lazımdır”.
