“Hər şey plana uyğun gedir”
28.03.2022 , 17:23
“Təlim-məşq toplanışını kifayət qədər məhsuldar davam etdiririk. Yaxşı çıxış etmək üçün gözəl şərait yaradılıb”.
Korner.az xəbər verie ki, bunu Latviya millisinin baş məşqçisi Daynis Kazakeviç Azərbaycanla keçiriləcək yoldaşlıq görüşü öncəsi mətbuat konfransında deyib.
41 yaşlı mütəxəssis yoldaşlıq görüşlərinin Millətlər Liqasına hazırlıq baxımından uğurlu olacağını düşünür: “Yığmaların kontekstində nadir hallarda bu qədər məhsuldar məşq etmək mümkün olur. Bizim vəzifəmiz oyunun kritik elementləri üzərində işləməkdir. İyunda keçiriləcək Millətlər Liqası matçlarına hazırlaşırıq. Hər şey plana uyğun gedir, futbolçuların əhval-ruhiyyəsi yaxşıdır, motivasiyaları qaydasındadır. Təbii ki, müəyyən çatışmazlıqlar da var”.
Kazakeviç istənilən matça qələbə üçün çıxdıqlarını vurğulayıb: “Hər bir görüşdə əsas məqsədimiz qələbə qazanmaqdır. Bunun rəsmi və ya yoldaşlıq görüşü olmasının fərqi yoxdur. Çalışmalıyıq hücumçular ən yaxşı mövqelərdə olsunlar ki, qol vurmaq şansları olsun. Təbii ki, komandamızın böyük potensiala malik olduğu standart vəziyyətlərdən yararlanmaq lazımdır. Ancaq biz buna nail olmamışıq, hətta yaxınlaşmamışıq”.
O, sabahkı qarşılaşmada ideal “11-liy”ə güvənəcəyini söyləyib: “Azərbaycanla oyunda ən yaxşı futbolçulardan istifadə edəcəyik. İki görüş arasında üç günün olması bərpaya kömək edir. Debütantlar da yaxşı təəssürat yaratdılar. Onların komandaya cəlb olunması bizə müsbət təkan verdi. Sabahkı matçda debütlər mümkündür. Məşqdə gördüklərimə əsasən deyə bilərəm ki, bu uşaqları çağırdığım üçün peşman deyiləm. Onlar bizə daxili rəqabət təmin edirlər”.
Qeyd edək ki, sabah Maltada keçiriləcək Azərbaycan – Latviya oyunu Bakı vaxtı ilə saat 15:00-da start götürəcək.
