“Hələ karyeramı başa vurmağın zamanı gəldiyini hiss etməmişəm” – Marko Deviç

35 yaşlı hücumçu məşqçi kursunə öz işi ilə əlaqədar yazıldığını və bu peşəni həyatda hər şeydən çox sevdiyini vurğulayıb: “Hər böyük futbolçudan yaxşı məşqçi alınmaz. Deməli, mənim şansım var. Çünki özüm ortabab futbolçu olmuşam. Əlbəttə, bu, zarafatdır.  Məşqçilik xüsusiyyətləri fərdi məsələlərdir.  Bu, oyunçudan, insandan asılıdır. Yaxşı məşqçi olmaq istəyirəm. Hər bir təhsil sessiyası mənə deyir ki, ora getmək lazımdır”.

Serb əsilli futbolçu məşqçilikdə pillə-pillə irəliləmək istədiyini söyləyib: “Bəli, mən yaxşı oynamışam. Amma məqşçililk üçün təcrübə lazımdır. Ola bilsin, bir-iki il köməkçi-məşqçi kimi çalışmaq lazımdır.  Harada məni görmək istəsələr, orada da çalışaram”.

Deviç karyerasını Ukraynada başa vurmaq istədiyini sözlərinə əlavə edib: “Bəzi variantlar var idi. Karyeramı başa vurmağı qərara alsam, son ilimdə Ukraynada oynamaq istərdim. Ukrayna Premyer Liqasına uyğun gəlib-gəlməməyim funksional vəziyyətimdən asılıdır. Qalan məsələlərə görə narahat deyiləm. Sağlamlığım imkan versə, düşünürəm ki, uyğun gələrəm”.

“Sabah”ın hücumçusu futbolçu karyerasını başa vuracağı vaxtı açıqlamasa da, hər bir məşq və oyuna sonuncu kimi çıxdığını söyləyib: “Başa düşürəm ki, böyük səhvlər və zədə karyerama təsir edə bilər. Qol vurub qələbə qazanmaqla özümü və azarkeşləri sevindirmək istəyirəm. Hələ karyeramı başa vurmağın zamanı gəldiyini hiss etməmişəm”.

Qeyd edək ki, Marko Deviç “Sabah”a bu mövsümün əvvəlində keçib.