Bu gün “Rəvan” Azərbaycan kubokunun 1/4 final mərhələsinin cavab oyunu çərçivəsində səfərdə “Bakı”nın qonağı olub.
Korner.az-ın məlumatına görə, ilk oyunda “Bakı”ya 0:1 hesabı ilə məğlub olan “Rəvan” təkrar görüşdə eyni hesabla qələbə qazanıb. Beləcə oyunda əlavə vaxta, daha sonra penaltilər seriyasına ehtiyac duyulub. Penaltilərdə isə “aslanlar” daha dəqiq oynayıb. Beləcə “Rəvan” adını yarımfinala yazdırıb.
Oyundan sonra “Rəvan”ın baş məşqçisi Güvənc Kurtar görüşlə bağlı fikirlərini bildirib: “Çox sevincliyik. Bütün futbolçularımı təbrik edirəm. Mən bu oyuna gəlməzdən əvvəl futbolçularımı burada mərhələ adlayacağımıza inandırdım. Biz ilk dəfə yaxşı bir heyətlə meydana çıxdıq. Hər zaman penalti vuruşları üzərində çalışdıq. Çox yaxşı mübarizə etdik. Son 10-15 dəqiqəyə qədər riskə girmədim. Qələbə qazandığımız üçün çox xoşbəxtəm. “Bakı” yaxşı mübarizə apardı. Ancaq biz ağıllı oyun nümayiş etdirdik və penaltilərlə də olsa qalib gəlib mərhələ adladıq. Biz yaxşı komandayıq. İlk matçda da qələbə qazana bilərdik”.
