.jpg)
Sözün düzü, final matçına getməmişdən öncə qalmaqal yaşanacağını təxmin etmişdim. Hətta azarkeşlərdən tumuş, futbolçulara, klub rəsmilərinə kimi. Ancaq "kupon"umdakı son proqnozum "yandırdı".
Əvvəlcə düzgün təxminlərimdən deyim sizə.
Qarşılaşmanın prinsipial olduğunu göz önünə gətirib azarkeşlər arasında insidentin qaçılmaz olacağını anlayırdım. Hələ oyuna bir neçə saat qalmış aldığım dava-dalaş xəbərləri bunun isbatı oldu. Saat 16:00 radələrində bir "Neftçi" azarkeşinin bölməyə aparılması ilə bağlı redaksiyamıza gələn xəbər Böyük Finalda böyük şeylərin olacağına dəlalət edirdi. Ancaq azarkeşlərin məhz oyunun başlamasına bir müddət qalmış, yerlərinə qalmaqalsız oturmasına türklər demişkən "şaşırdım". Ancaq əsas olan "proqnoz"umun doğrulması idi.
Futbolçular arasında qalmaqalın olacağı proqnozum sonda doğruldu. Yumruq atıldı, qan töküldü, söyüş söyüldü… "Əsrin qəhraman"ları isə Kamran Abdullazadə, Mahir Şükürov və onların "tırka"sına gedən Elnur Allahveriyev oldu. Hadisə isə belə baş verdi.
Mahir Şükürov dəqiqləşdirə bilmədiyim məsələyə görə Lənkəranlıların gənc futbolçusu Kamran Abdullazadəni vurdu. Gənc futbolçunun davaya müdaxiləsi qanının tökülməsi ilə nəticələndi. Mahir Şükürov Kamran Abdullazadəni "nə yemisən – turşulu aş" prinsipi ilə döydü. Nəticədə Kamran qan içində qaldı və bundan sonra "komediya" başladı. Mahir Kamranı "zərbə atəşinə" tutdu. Bu isə "ağ-yaşıllar"ın futboçusu Elnur Allahverdiyevin xoşuna gəlmədi. Mahir Şükürovla əlbəyaxa olan Elnur onun ünvanına təhqiramiz ifadələr işlətdi və Mahiri Azərbaycanda biabır edəcəyini dedi. Yadımdadı, eyni təhqiramiz ifadələri Mahirə qarşı Elnur millinin Portuqaliya ilə səfər oyununda da işlətmişdi.
Həngamənin qopduğu anlarda diqqətimi klub mühafizəçilər çəkdi. Futbolçuların davasına müdaxilə etmək əvəzinə, sanki qollarının gücünü göstərmək üçün "ər meydanı"na atılmışdılar.
Bir müddətdən sonra ara müvəqqəti olaraq sakitləşdi. "Xəzər Lənkəran"ın futbolçuları və məşqçi heyəti ehtiyat oyunçular skamyasında Daxili Qoşunlar tərəfindən bir müddət qorunurdu ki, bir də gördüm, PFL prezidenti Ramin Musayev Lənkəran klubunun futbolçularının yanına gəldi. Gəldi və peşman da oldu. Bu zaman "Neftçi"nin mühafizəçiləri ilə “Xəzər Lənkəran”ın oyunçuları arasında dava başladı. Hətta Musayev məsələyə müdaxilə etmək üçün araya girsə də, bu heç nəyi dəyişmədi. Yaxşı ki, bir müddət keçdikdən sonra hər şey qaydasına düşdü.
Ən son xoş görüntünü isə Sadıq Sadıqov verdi. "Neftçi"nin prezidenti məğlub "Xəzər Lənkəran"lı futbolçulara və məşqçilər heyətinə təsəlli verdi…
Səxavət Qurbanov
