Gənclər və İdman Nazirliyində dopinqlə mübarizə mövzusunda görüş
14.02.2022 , 20:34
Fevralın 14-də Gənclər və İdman Nazirliyində Azərbaycan Milli Antidopinq Agentliyinin rəhbərliyi və mütəxəssisləri ilə görüş keçirilib.
Korner.az xəbər verir ki, nazirliyin İdman şöbəsi əməkdaşlarının iştirakı ilə təşkil edilən görüşdə dopinq əleyhinə mübarizə mövzusunda müzakirələr aparılıb.
İdman şöbəsinin müdiri Elnur Məmmədov çıxış edərək bu günlərdə Pekin Qış Olimpiya Oyunlarında baş verənlərin dopinq probleminin bütün dünya üçün aktuallığını qoruduğunu və bu baxımdan belə görüşlərin əhəmiyyətini qeyd edib. Bu səbəbdən nazirliyin, federasiyaların və AMADA-nın bu sahədə birgə fəaliyyətinin vacibliyini vurğulayıb.
AMADA-nın direktoru Şəfəq Hüseynli idmanda dopinq nəzarətinin əhəmiyyəti, təmiz idman dəyərlərinin və ədalətli idman mühitinin qorunmasının vacibliyi, idman qurumları arasında əməkdaşlığın genişləndirilməsi, bu cür görüşlərin mütəmadi keçirilməsinin əhəmiyyətini qeyd edib. Agentliyin direktor müavini Elnarə Rəsulzadə milli test proqramının formalşması, risklərin hesablanması, həmçinin idman qurumları ilə məlumat mübadiləsinin əhəmiyyəti barədə məlumat verib.
Qurumun hüquq şöbəsinin müdiri Fərhad Abasov antidopinq qayda pozuntuları haqqında məlumat verərək, bu pozuntuların hüquqi nəticələri və antidopinq icraatlarında hüquqi prosedurlar barədə yenilikləri diqqətə çatdırıb. Təhsil şöbəsinin müdiri Lalə Hacıyeva isə antidopinq maarifləndirməsi, maarifləndirmənin effektivliyinin artırılması yolları, Test şöbəsinin müdiri Kəmalə Babayeva isə idmançıların testlərə cəlb olunması zamanı davranışları, diqqət edilməli məqamlar, milli test proqramına cəlb edilən idmançıların təcrübə qazanmasının əhəmiyyəti barədə məlumat verib.
Nazirliyin İqtisadiyyat şöbəsinin müdiri Mehman Ramazanov və Gənclərlə iş şöbəsinin baş məsləhətçisi Fidan Rüstəmlinin də iştirak etdiyi görüşdə qarşılıqlı məlumat mübadiləsi aparılıb və mövcud problemlər müzakirə edilib.
