Futzal üzrə UEFA kubokunun 2017/18 mövsümünün detalları açıqlanıb. Apasport.az saytının məlumatına görə, tədbir iyulun 6-da İsveçrənin Nyon şəhərində keçiriləcək. Mərasim Bakı vaxtı ilə saat 16:00-da başlayacaq.
Qarşıdakı mövsüm yeni rekordla əlamətdar olacaq. Belə ki, futzal tarixində ilk dəfə UEFA kubokuna 56 komanda qatılacaq.
Tarixdə daha bir ilk 4 ölkə – İspaniya, Portuqaliya, İtaliya və Rusiyanın 2 komanda ilə təmsil olunması ilə bağlıdı.
Yarışların reqlamentinə əsasən 56 komanda əmsallarına görə iki qrupa bölünüb. 32 zəif komanda avqustun 22-27-də təsnifat mərhələsində iştirak edəcək. 8 qrupun qalibləri əsas raunda yüksələcək.
Digər 24 komanda isə birbaşa əsas mərhələdən mübarizəyə başlayacaq. Bu oyunlar oktyabrın 10-15-də baş tutacaq.
Azərbaycan çempionu “Araz” da əsas mərhələdən yarışa qatılacaq. Burada klublar A və B yolu üzrə hərəkət edəcək.
Son qalib “İnter”, həmçinin reytinqdə 1-11 və 16-19-cu yerlərdə qərarlaşanlar A yolunda çıxış edəcək. Bu 16 komanda 4 qrup təşkil edəcək.
Əmsalına görə 12-15 və 20-23-cü olanlar və təsnifat mərhələsinin 8 qalibi B yolunda qüvvəsini sınayacaq. A yolunda hər qrupdan 3, B yolunda isə hər qrupun yalnız qalibi mərhələ adlayacaq.
Bu 16 klub elit-raundda mübarizə aparacaq. Oktyabrın 19-dakı püşk bu klubları 4 qrupa böləcək. Elit raund noyabrda, qaliblərin yüksələcəyi “Dördlər finalı” 2018-ci ilin aprelində baş tutacaq.
İştirakçı komandalar indidən səbətlərə bölünüb. Futzal üzrə UEFA kubokunda həmişəki kimi səbətlər hər iki mərhələ üçün təşkil edilib. İlk 5 səbət təsnifat, 6-9-cu səbətlər əsas mərhələnin B, 10-14-cü səbətlər A yolu üçün nəzərdə tutulub.
Azərbaycan çempionu “Araz” 9-cu səbətdədi. Bu isə o deməkdi ki, Naxçıvan klubu əsas mərhələnin B yolu üzrə mübarizəyə qoşulacaq. Burada qrupunun səpələnmişi olacaq komandamız mütləq 1-ci yeri tutmalı olacaq. Çünki yalnız qrup qalibi kimi elit raunda çıxa biləcək.
“Araz”ın yarışacağı raundun oyunlarına Slovakiya, Xorvatiya, Finlandiya və Rumıniya ev sahibliyi edəcək. Amma çempionumuz qrupunda səpələnmiş olacaq ilk iki ölkə ilə üz-üzə gələ bilməz. Ona görə də “Araz” iki variantdan birində – ya Finlandiya ya Rumıniyada oynamalıdı.
UEFA Azərbaycan və Ermənistan çempionlarının eyni qrupa düşməməsini də nəzərə alıb. Bu üzdən “Leo” təsnifat mərhələsindəki püşkatmasında, onlar mərhələ adlasa hər iki komandanın əsas raundda ayrı-ayrı qruplara salınacaq. (apasport)
