“Qəbələ” AFFA Gənclər Liqasında son turda “Qarabağ”la 0:0 hesablı heç-heçə edərək çempionatın qalibi olub.
Turnirin qalibi olan “Qəbələ” klubunun çalışdırıcısı Famil Xəlilov Korner.az-a müsahibə verib. Xəlilov öncə oyunu dəyərləndirib:
– Çempionatda böyük rəqabət oldu. Uşaqlar “döyüşdülər”, mübarizə apardılar. Hər iki komandanı təbrik edirəm. Qalib gələn Azərbaycan futbolu oldu. Bu uşaqlarda Azərbaycanın yığma komandalarında oynamaq potensialları var.
– UEFA Gənclər Liqasında bu heyətlə mübarizə aparacaqsız. Legioner futbolçunun transferini tələb edəcəksiz?
– Düşünmürəm ki, bizim legioner futbolçuya ehtiyacımız var. Çünki akademiyamızda yetərincə istedadlı futbolçu var. Onlardan faydalansaq, daha yaxşı olar.
– Çempionatı məğlubiyyətsiz başa vurduz. Bu da futbolda az-az hallarda rast gəlinir…
– Bu uşaqların istəyinə bağlıdır. Onlar UEFA Gənclər Liqasında oynamaq istəyirdi. Buna görə də hər oyuna əzmkar çıxırdılar.
– Amma finala layiq oyun görmədik…
– Futbolçulara xüsusi tapşırıq verməmişdik. “Qarabağ” güclüdür, istedadlı futbolçuları var. Onların hücumlarının qarşısını aldıq.
– Abbaslı Məhəmmədi oyuna daxil etdikdən 5-6 dəqiqə sonra əvəzlədir. Bu nə ilə bağlı idi?
– İstedadlı oyunçudur. Sadəcə, ayağında ağrı olunduğu hiss edildi. Tez əvəzlədik ki, meydanda sonradan azlıqda olmayaq.
– Bu gün siz Azərbaycan futbolunda ad qoymuş Rəşad Sadıqov üzərində qələbə qazandız. Bu, sizin üçün stimul sayılır?
– Futbolçularımla fəxr edirəm ki, tapşırıqlarımı yerinə yetirdilər. “Qarabağ” haqda onu deyə bilərəm ki, yaxış heyətləri var. Rəşad müəllimi də buna görə təbrik edirəm.
