“Futbolçular sona qədər mübarizə apardı”
01.10.2021 , 01:37
“Futbolçulara əzmkar mübarizəyə görə təşəkkür edirəm. Yaxşı mübarizə apardıq. Düzdür, ilk hissədə hesabda geri düşdük. Ancaq futbolçular sona qədər mübarizə apardılar. Rəqibə də gələcək oyunlarda uğurlar arzulayıram”.
Korner.az xəbər verir ki, bu sözləri “Qarabağ”ın baş məşqçisi Qurban Qurbanov Konfrans Liqasının qrup mərhələsinin I turunda Kiprdə “Omoniya”ya 4:1 hesabı ilə qalib gəldikləri oyundan sonra mətbuat konfransında deyib.
Mütəxəssis, ikinci hissənin daha sürətli keçdiyini bildirib: “Standart vəziyyətlərdə daha diqqətli olmağı tapşırmışdım. İkinci hissədə qalib gəlmək üçün meydana çıxmışdıq. Düşünürəm ki, bu hissə daha sürətli oldu. Hücumlarımız isə daha kəsərli idi”.
