2012-2013 mövsümünün hazırlıqlarını davam etdirən “Qəbələ” növbəti transferini reallaşdırıb.
Korner.az-ın klubun rəsmi saytına istinadən verdiyi məlumata görə, son iki mövsümü Portuqaliya Superliqasında “Vitoria" Setubalın heyətində keçirən braziliyalı Dieqo Kosta da Silva “Qəbələ” ilə 2 illik müqavilə imzalayıb.
Qolkiperin Portuqaliya klubu ilə müqaviləsi davam etsə də, anlaşma tərəflərin qarşılıqlı razılaşması ilə ləğv edilib və “Vitoria Setubal” qapıçının “Qəbələ”yə keçidinə icazə verib. Dieqo Kosta imzadan öncə İstanbul Acıbadem xəstəxanasında tibbi müayinədən keçib.
Braziliyada – İtaki bölgəsində anadan olan Dieqo Kosta peşəkar karyerasına doğma ölkəsində 1998-ci ildə “Yuventud” klubunda başlayıb. 2002-ci ilə qədər sözügedən komandanın çərçivəsini qoruyan Dieqo daha sonra “Atletiko PR” (Braziliya, 2003- 2005), “Fluminense” (Braziliya, 2006-2008), “Santo Andre” (Braziliya, 2009), “Leiksos” (Portuqaliya, 2009-2010) və “Vitoria Setubal”ın (Portuqaliya, 2010-2012) 1 nömrəli formasını geyinib. Dieqo ötən mövsüm Portuqliya mətbuatı tərəfindən ilin ən yaxşı qapıçısı seçilib.
