Azərbaycan milli komandasının Belarus yığması ilə yoldaşlıq görüşü keçirməkdən imtinası barədə AFFA Belarus Futbol Federasiyasına (BFF) rəsmi məktub yazıb.
Korner.az-ın məlumatına görə, sənəddə iyunun 5-də Minskdə nəzərdə tutulmuş qarşılaşmanın baş tutmamasının səbəbi göstərilməyib.
BFF sədrinin I müavini Sergey Səfəryan AFFA-dan aldıqları məktubu xoşagəlməz gözlənilməzlik kimi dəyərləndirib: “Axı rəsmi razılıq əldə olunmuş və yoldaşlıq görüşünün keçirilməsi üçün müqavilə də bağlanılmışdı. İndi təcili olaraq iyunun 5-ə yeni rəqib axtarmalıyıq”.
Qeyd edək ki, AFFA-nın rəsmi saytı Belarusla yoldaşlıq görüşünün yığmamızın baş məşqçisi Berti Foqts tərəfindən ləğv olunduğunu açıqlayıb, Səbəb kimi millimizin üzvlərinin əsasən Unibank Premyer Liqasının aparıcı klublarında çıxış etməsi və həmin klubların avrokuboklarda mübarizə aparacağı, Belarus yığması ilə yoldaşlıq oyununun avrokubok qarşılaşmaları ərəfəsinə təsadüf etməsi göstərilib.
