Bu gün Gənclər və İdman Nazirliyində Almaniyanın Düsseldorf şəhərində keçirilmiş cüdo üzrə “Böyük Dəbilqə”, eləcə də Kiyevdə Ukraynanın görkəmli güləşçi və məşqçilərinin xatirəsinə həsr olunmuş XXII beynəlxalq turnirdə uğurlu çıxış edən Azərbaycan idmançıları ilə görüş keçirilib
Tədbirdə Nazirliyin idman şöbəsinin müdiri Fərid Mansurov, Azərbaycan Güləş Federasiyasının (AGF) I vitse-prezidenti Firdovsi Umudov, məşqçilər və digər şəxslər iştirak ediblər. F.Mansurov hər iki yarışda Azərbaycan idmançılarının əldə etdikləri uğurları yüksək qiymətləndirib: “Güləşçilərimiz Kiyevdə çox yaxşı çıxış ediblər, yüksək əyarları medal qazanıblar. Bu da AGF-in güləş ənənələrinə sadiq qaldığını göstərir. Cüdoçumuz Rüstəm Orucov və İrina Kindzerska da “Böyük Dəbilqə”də fəxri kürsüyə yüksəlməyi bacardı”.
AGF-in I vitse-prezidenti olmaqla yanaşı, sərbəst güləş üzrə Azərbaycan millisinin baş məşqçisi olan F.Umudov göstərilən diqqətə görə təşəkkür edib. Baş məşqçi deyib ki, yarış Xocalı faciəsinə təsadüf etdiyindən erməni güləşçilərlə görüşlərdən əvvəl idmançlarla söhbət aparılıb: “Təqvim planımız çox sıxdır. Güləşçilərimizi Dünya Kuboku, Avropa çempionatı, Yeniyetmələrin Yay Olimpiya Oyunları gözləyir. Güləşçilərimiz Kiyevdə əzmkarlıq, kişilik göstərdilər. Ermənistan idmançılarına qalib gəldilər. İdmanı siyasətə qarışdırmaq istəməzdim. Ancaq pəhləvanlarımızın çıxışı, həqiqətən, təqdirəlayiqdir. Belə də davam etmək lazımdır. Qazanılan qələbələr keçmişdə qaldı, irəli baxmalıyıq. Əlbəttə, səhvlər var və onları aradan qaldırmalıyıq. Kiyevdəki yarış Rusiyanın Kaspiysk şəhərində keçiriləcək Avropa çempionat hazırlıq xarakteri daşıyırdı. Burada oturan idmançıların çoxu olimpiya, dünya və Avropa çempionatında medal qazananlardır. Xüsusən də gənclərimiz uğurlara “acdırlar”.
