Ölkə kubokunun final oyunundan sonra təkcə futbolçular deyil, həmkarımız da təzyiqə məruz qalıb.
Korner.az-ın məlumatına görə, futbolpress.az saytının baş redaktoru Elçin Cəlilov "Xəzər Lənkəran"ın xəsarət almış futbolçusu Kamran Abdullazadənin fotosunu çəkmək istəyərkən cənub klubunun mühafizəçilərinin hədə və təzyiqiylə üzləşib.
Həmkarımız həmin anı belə şərh edib: "Mən dava düşən anda press-lojadan düşdüm meydançaya ki, hadisələri yaxından görüm. Gördüklərimi informasiya halında redaksiyaya ötürdüm, yazıldı, bu, başqa məsələ. Sonra hadisədən xəsarət almış Kamran Abdullazadənin fotosunu çəkməkçün birtəhər "Xəzər Lənkəran"ın soyunub-geyinmə otağına tərəf yaxınlaşdım. Kamranı çəkdim, sonra Toşakın fotosunu çəkdim. Mane olmamaq üçün ordan çıxırdım, Toşak əsəbi halda üstümə gəldi, və kimliyimi soruşdu. Jurnalist olduğumu bildirdim, fotonu silməyimi və otağı tərk eləməyimi tələb elədi. Mən də Toşakın ixtiyarı olan tələbə əməl elədim. Otaqdan çıxırdım, birdən bir nəfər yaxınlaşıb qolumdan tutdu və çox kobud formada, söyüşlər və hədələrlə təhdid elədi. Kimliyini soruşdum, "Rədd ol, səni çırpacam, görərsən sən. Bilirəm kimsən" – dedi. Şokda və təəccüblü halda tez tərk elədim oranı.
Halbuki mən xəsarət almış futbolçudan informasiya hazırlamaqçün ora getsəm də, işimi hansısa kobudluq, qayda pozuntusu eləmədən görsəm də, heç o şəxsin və hədə-qorxu davranışını anlamadım. Komandaya medallar verildi, sonra onlar yenidən soyunub-geyinmə otağına gedəndə mən həmin şəxsə və klubun başqa rəsmilərinə yaxınlaşıb vəziyyəti anlatmaq istədim. Həmin şəxsin mənə qarşı hədə-qorxu, kobud davranışının səbəbini öyrənmək istədim. Birdən vəziyyət yenidən qızışdı və bu dəfə mənə əl-qol atdı. Mən bir az aralaşıb, başqalarından həmin şəxsin kimliyini soruşdum. O, yenidən qaçaraq üstümə hücum çəkdi. Bu dəfə məqsədi vurmaq, xəsarət yetirmək idi. Əgər klubun tərcüməçisi Elvar Quliyev yaxınlıqda olmasaydı, hər şey pis ola bilərdi.
Mən heç imkan edib, nə Elvardan, nə də başqalarından onun kimliyini öyrənə bildim. Ancaq bildim ki, klubun mühafizə xidmətində işləyir və adı Əyyubdu.
Hələ də anlamamışam, niyə belə davranış olmalıydı, mən öz işimi yerinə yetirirdim, xəsatər almış "Xəzər Lənkəran" futbolçusunu çəkirdim, niyə vaxtında futbolçusunu mühafizə edə bilməyən şəxs gücünü mən göstərməyə çalışsın və ən əsas niyə dəfələrlə məni təhdid eləsin. – "Səni tapacam, bilirəm kimsən" dedi. Deməli, bu şəxs haqqımızda hansısa mənfi informasiyalarla təlimatlandırılıb. Jurnalistə peşə fəaliyyəti zamanı xəsarət yetirmək və hədə-qorxu gəlmək nə deməkdi. Mən istərdim "Xəzər Lənkəran"ın rəhbəri Mais Mənsimov bu məsələni araşdırsın, klub bu barədə bizə və ictimaiyyətə məlumat versin".
