FİFA-da aparılan korrupsiya əməliyyatı dərinləşməkdədi.
Korner.az-ın məlumatına görə, ali futbol qurumunun prezidenti Yozef Blatter korrupsiya ilə bağlı aparılan təhqiqatı dəstəklədiyini bildirib.
Bu barədə o, özü bəyanat yayıb. Bəyanatda deyilir ki, təşkilatın rəhbərliyi ABŞ və İsveçrə hakimiyyət dairələri tərəfindən aparılan istintaqı alqışlayır: “Hesab edirik ki, bu, FİFA-nın futbolda korrupsiyanın qarşısının alınması üçün indiyədək həyata keçirdiyi tədbirləri gücləndirəcək.”
İsveçrə polisi və Amerika Federal Təhlükəsizlik Bürosunun həyata keçirdiyi əməliyyat Blatterin planlarını pozub. Onun yaşanan hadisələrdən sonra FİFA-nın idarəçiliyində yaranmış problemlərlə məşğul olduğu və bu səbəbdən iclasda iştirak etmədiyi vurğulanıb. Bu gün həm də qurumda növbəti prezident seçkiləri keçiriləcək. Post uğrunda iki namizəd yarışacaq. Bunlardan biri hazırkı prezident Yozef Blatter, digəri isə İordaniya şahzadəsi Əli bin Əl-Hüseyndi.
İsveçrədə FİFA məmurlarının həbs qalmaqalının Rusiya ilə əlaqəli olduğu xəbərləri də mətbuatda hallanmaqdadı. Bunu görə də Rusiya prezidenti Vladimir Putin açıqlaması ilə qalmaqala müdaxilə edib. O bildirib ki, həbslərin futbol üzrə dünya çempionatının 2018-ci ildə Rusiyada keçiriləcəyi ilə əlaqəsi yoxdu. Prezident bəyan edib ki, ABŞ-ın sorğusu əsasında İsveçrədə FİFA məmurlarının həbsi çox qəribədi: “Hesab edirəm ki, bu həbslərlə ABŞ öz nüfuzunu digər dövlətlərdə genişləndirməyə və Yozef Blatterin yenidən FİFA prezidenti postuna seçilməsinə mane olmağa çalışır. Mən artıq buna tamamilə əminəm. Həbslər çox qəribədi. Çünki kütləvi həbslər ABŞ tərəfinin sorğusu əsasında korrupsiya ittihamı ilə həyata keçirilir. Halbuki həbs edilənlər ABŞ vətəndaşı deyil”.
Xatırladaq ki, mayın 27-də Sürixdə FİFA-nın bir sıra yüksək vəzifəli şəxsləri həbs edilib. Onlar ümumilikdə 10 milyard dollardan çox rüşvət almaqda şübhəli bilinirlər. Korrupsiya cinayətləri üzrə işdə 14 futbol funksionerinin, o cümlədən FİFA-nın iki vitse-prezidentinin adı da var. Digər tərəfdən, Blatter dünən İsveçrənin Sürix şəhərində işinə başlayan qurumun 65-ci Konqresində iştirak etməyib. Buna ittiham edilən 14 FİFA rəsmisinin həpsinin səbəb olduğu bildirilir. (futbolinfo.az)
