İspaniya La Liqasının 25-ci turunda “Deportivo” “Atletiko”nu qəbul edib. “Riasor” stadionunda keçirilən oyunun 85-ci dəqiqəsində qonaq komandanın hücumçusu Fernando Torres “Deportivo”nun futbolçusu Aleks Berqantinosla toqquşaraq yerə yıxılıb. İspan forvardın bir müddət huşsuz halda yerdə qalması hamını qorxuya salıb. Dili qatlanan futbolçuya ilkin tibbi yardım meydançada, komanda yoldaşları tərəfindən göstərilib. Bundan dərhal sonra isə həkimlər meydançaya daxil olub. Torresə tibbi yardım göstərilməsi oyunda bir neçə dəqiqəlik fasilənin yaranmasına səbəb olub. Oyunçuya tibbi yardımın uzanması hər iki komandanın oyunçularının və azarkeşlərin ciddi narahatlıq keçirməsinə səbəb olub.
Həkimlərin ilkin müdaxiləsindən sonra Torres xərəkdə meydançadan çıxarılaraq xəstəxanaya aparılıb. İlkin müayinədən sonra hücumçuda beyin zədələnməsinin olmadığı aşkarlanıb. Gecəni xəstəxanada keçirən hücumçunun durumuna aydınlıq gəlib.
32 yaşlı oyunçu şəxsi “twitter” hesabında bunları qeyd edib:
“Dəstəyiniz və mesajlarınız üçün təşəkkür edirəm. Bu, sadəcə, ani vəziyyətdə baş verən hadisə idi. Qorxulu heç nə yoxdu. Ümid edirəm ki, tezliklə geri dönəcəm”.
