“Fasilədə həm danladım, həm də bağışladım” – Qurban Qurbanov
12.07.2022 , 23:06
Çempionlar Liqasında I təsnifat mərhələsinin “Qarabağ” – “Lex” (Polşa) cavab oyunundan (5:1, ilk oyun – 0:1) sonra təşkil edilən mətbuat konfransında Azərbaycan təmsilçisinin baş məşqçisi Qurban Qurbanov jurnalistlərin suallarını cavablandırıb.
Korner.az xəbər verir ki, mütəxəssis oyunla bağlı bunları deyib:
“Hamını qələbə münasibəti ilə təbrik edirəm. Çox möhtəşəm qələbə oldu. Bu cür qalibiyyətlə nadir hallarda olur. Sadəcə, hər şey istədiyimiz kimi alındı. Futbolçular çox istəkli idilər. İlk saniyələrdə qol buraxsaq, sınmadıq. Oyun intizamını saxladıq. Çox yaxşı komandaya qalib gəldik. Fərqli, sürətli oyunçuları var. Yaxşı əks hücuma çıxırdılar. Bu, bir başlanğıcdır. İlk oyundan sonra hamı Polşa azarkeşlərindən danışırdı. Bu gün gördük ki, bizim fanatlarımız onlardan üstündür. Dünən dedim ki, 10 milyon bizim arxamızdadır. Bu gün də bunun şahidi olduq. Yerimizdə dayanmalı deyilik. Daha ciddi, məsuliyyətli olmalıyıq. Futbolçuların mübarizəsi alqışalayiqdir”.
Qurbanov deyib ki, ötən gecə yuxusunda Aqil Abbası görüb: “Gecə yuxumda Aqil Abbası gördüm. Görürəm ki, Şuşadayıq, dağın başında qarın içindədi. Deyir ki, şəhər istidir, bax gör, təpələr necə qarlıdır. Buradan ona salamlarımı çatdırıram”.
Mütəxəssis rəqib komandanın baş məşqçisi Con Van den Bromun hakim səhvləri ilə bağlı fikirlərinə də münasibət bildirib: “Hakimliklə bağlı danışılası əlavə nəsə yoxdur. Bizə qarşı da haqsızlıqlar olub. Bu cür fikir bildirməsi normaldır. Məğlub olanda belə şeylər baş verir. Onlara da uğurlar arzu edirəm”.
Mütəxəssis hər bir jurnalistə öz yaxını kimi baxdığını vurğulayıb: “Biri tənqid edir, biri tərifləyir. Onlar yenə də komandamın arxasındadır. Bu cür şeyləri normal qarşılayıram. Elçin müəlimin kövrəlməsi normaldır. Məndə də olur. Ümumiyyətlə, bu, futbola bağlı hər kəsdə baş verə bilər”.
Qurbanov bildirib ki, futbolçusi Kadi Borgesi yersiz sarı vərəqə aldığı üçün əvvəl danlayıb, sonra isə bağışlayıb: “Belə şeylərə çox həssas yanaşıram. Heç nədən sarı vərəqə almağı oyunçuya yaraşdırmıram. Buna görə hirsləndim. Amma eşidəndə ki, birinci “sarı”sıdır, fasilədə həm danladım, həm də bağışladım (gülür)”.
