Farer adalarının baş məşqçisi: “Azərbaycan millisi üçün çətin olacaq”
10.10.2018 , 14:43
“Rəqibimizin oyunlarını izləmişəm. Azərbaycan bizim üçün çətin komandadır. Bu oyunda daha yaxşı oynamalı və müsbət nəticə əldə etməliyik”.
Bu sözləri Farer adaları miliisinin baş məşqçisi Lars Olsen Millətlər Liqasında Azərbaycanı qəbul edəcəkləri oyundan öncə deyib. Danimarkalı çalışdırıcı yalnız qələbə barədə düşündüklərini bildirib: “Ölkələr arasında uzun məsafə var. Azərbaycanlı futbolçular həftəsonu oyun keçiriblər. Buna görə də onlar üçün çətin olacaq. Ancaq biz də Azərbaycana yollanacağıq. Başqa əlac yoxdur. Bizim hədəfimiz 3 xal üçün oynamaq olacaq. Evdəki oyunda qalib gəlməyə çalışacağıq. Qələbədən başqa heç nə düşünmürük. Məğlub olmağı qətiyyən düşünmürük”.
57 yaşlı mütəxəssis millimizdə “Qarabağ”lı oyunçuları fərqləndirib: “Qarabağ”ın Avropa Liqasında “Arsenal”la oyunlarını izləmişəm. Rəqibimizin müdafiə və yarımmüdafiə xəttini “Qarabağ”dan olan oyunçular təşkil edir. Onlar güclü oyunçulardır”.
Qeyd edək ki, Farer adaları – Azərbaycan oyunu sabah Bakı vaxtı ilə 22:45-də başlayacaq.
