Güləş üzrə Olimpiya çempionu Fərid Mansurovun müsahibəsi:
– Fərid Mansurov kimdir?
Fərid Mansurov xalqını sevən, dövlətinə sadiq, sadə bir Azərbaycan vətəndaşıdır.
– Necə oldu ki, idmanın məhz bu növünü seçdiniz?
Güləş idman növü bizim milli idman növüdür və hər ailədə olduğu kimi bizim ailədə də güləşə böyük önəm verilirdi. Ona görə də güləşlə məşğul oldum.
– İlk uğuru neçə yaşınızda əldə etmisiniz?
İlk uğuru 1994-cü ildə İran İslam Respublikasında keçirilən yeniyetmələr arasındakı beynəlxalq turnirdə qazanmışam.
– Ən yadda qalan güləşiniz hansı olub?
Belə güləşlərim çox olub. Amma mənə görə ən yadda qalan güləş 2004-cü il Olimpiya oyunlarının finalında, türk idmançı Şərəf Eroğlu ilə olan güləşim olub. Ona görə yadda qalan olub ki, ondan qabaq həmin türk idmançı ayrı-ayrı yarışlarda 3 dəfə məni məğlub etmişdi. Qismət elə gətirdi ki, Olimpiyadanın finalında da mən onu məğlub etdim .
– Bəs, ən çox çəkindiyiniz rəqibiniz kim olub?
Çəkinmək deməzdim, rəqiblərimdən həmişə ehtiyat etmişəm. Çünki rəqibə laqeyd yanaşsan, məğlub olarsan. Ona görə də, həmişə bu sözü şamil tutaraq, bütün rəqiblərimə ciddi yanaşmışam. Eyni zamanda, hər bir rəqibimlə ehtiyatlı davranmışam. Xüsusi çəkindiyim rəqib, elə türk idmançısı Şərəf Eroğlu olub.
– Güləş sizə nə qazandırıb?
Zədələrim çox olsa da, güləş mənə birinci növbədə sağlam bədən, sağlam ruh qazandırıb. Bununla yanaşı, səbrli, iradəli olmağı, bir çox tanışlıqlar, dostluqlar qazandırıb. Həqiqətən də, tək güləş yox, hər hansısa bir professional idman növü ilə məşğul olursansa, bu özü böyük bir məktəbdir. Çünki təlim-məşq toplanışlarının, yarışların hər biri sınaqdır.
– Qələbə çaldığınızda, Azərbaycan bayrağını yüksəyə qaldırdıqda hansı hissləri yaşayırdınız?
Çox təəssüf ki, o hissləri sözlərlə ifadə etmək olmur. Çünki o hissləri ancaq yaşamaq lazımdır və tam səmimi deyirəm ki, yaşadığım hissləri sözlərlə ifadə edə bilmirəm. Mən arzu edərdim ki, hər bir Azərbaycan vətəndaşı, ən əsası da, hər bir idmançımız o hissləri yaşasın. Doğrudan da, Azərbaycan bayrağı yüksələndə, himni səslənəndə insanın gözünə heç nə gorünmür. Bir fərəh hissi duyursan və bu torpağın, bu vətənin övladı olduğuna görə, həqiqətən də, qürur duyursan. Fikirləşirsən ki, mən də bir sıravi Azərbaycan vətəndaşı kimi nə isə etdim.
– Hazırki fəaliyyətinizlə bağlı ən son yeniliklər hansılardır?
Hazırda güləş üzrə gənclərdən ibarət yığma komandanın vitse-prezidentiyəm. Eyni zamanda, Avropa oyunlarının təşkilat komitəsinin üzvüyəm. (Mediagroup.Az)
