Emin Mahmudov: “Avroliqada uğurlu çıxış etmək üçün daha yaxşı oynamalıyıq”
28.08.2020 , 11:35
“Neftçi”nin kapitanı Emin Mahmudov Avropa Liqasının I təsnifat mərhələsində “Şkupi” üzərində qələbəni (2:1) dəyərləndirib. İkinci qolda məhsuldar ötürmənin müəllifi olan yarımmüdafiəçi bildirib ki, komanda Avropa Liqasında uğurlu çıxış etmək üçün daha yaxşı oynamalıdı:
“Çox çətin oyun oldu. Rəqib çox qapalı oynadı deyə, hücum etməyə çətinlik çəkdik. Daha çox cinahdan oynamaq istəyirdik, çünki rəqib bizi mərkəzdən sıxışdırırdı. Nəticədə cinah ötürməsindən sonra qol vurduq. Oyuna daha çox nəzarət etməliyik. İlk hissənin sonlarında yersiz top itirməyə başladıq. Şükür Allaha, mərhələni keçdik, amma Avroliqada uğurlu çıxış etmək üçün daha yaxşı oynamalıyıq. Məşqçimiz mərkəzdən daha az oynamağımızı tapşırdı deyə, sonuncu dəqiqəni saymasaq, ikinci hissədə rəqib əks-hücum yarada bilmədi”.
