Elşad Əhmədov: “İstəyimiz növbəti ilin komandasını qurmaqdır”
23.02.2019 , 19:25
Azərbaycan Premyer Liqasında XVIII turun “Sabah” – “Qarabağ” oyunundan (1:1) sonra keçirilən mətbuat konfransında meydan sahiblərinin baş məşqçisi Elşad Əhmədov jurnalistlərin suallarını cavablandırıb.
48 yaşlı mütəxəssis əvvəlcə görüş barədə fikirlərini bildirib:
– “Qarabağ”la oyunlar həmişə maraqlı olur. Son illərin çempionu ilə matçlarda futbolçular daha yüksək motivasiyayla hazırlaşır. 10 nəfər qalmağımıza baxmayaraq, futbolçularım xarakter göstərdi. Bir xal, bizim üçün qələbə kimi bir şeydi.
– “Qarabağ”ın sizdən çəkdiyi nədi?
– 12 il “Qarabağ”da oynamışam. Onların adı bizim üçün motivasiyadı. Bizdən çəkdiyi bir şey yoxdu. Sadəcə, bu, futboldu.
– Oyunun sonunda sevinməməyinizin səbəbi nə idi?
– Xarakterlə bağlıdı. “Zirə”ni məğlub etdiyimiz oyunda da sevinməmişdim.
– Məğlubiyyət sindromunun sonu gələ bilərmi?
– Bizim istəyimiz növbəti ilin komandasını qurmaqdır. Bunun üçün çalışırıq. Ola bilsin, hardasa nəyisə düz eləmirik, ancaq çox çalışırıq.
– “Neftçi” və “Qarabağ”la oyunlardan hansında daha çox çətinlik çəkirsiz?
– “Qarabağ”la matçlarda.
– Cavid İmamverdiyevin sonradan meydana daxil olmasına səbəb nə idi?
– İki gün məşqlərdə iştirak etməmişdi. Qripləmişdi. İstirahət verməyi düşündük.
– Hakimliklə bağlı düşüncələriniz nədi?
– İlk dəqiqələrdə gərgin oyun oldu. Sarı vərəqələr çox idi oyunun əvvəlində. Hakimlərin işinə müdaxilə etmək düzgün deyil.
