Belarus Futbol Federasiyası (BFF) ölkə yığmasının Azərbaycan milli komandası ilə iyunun 5-də Minskdə nəzərdə tutulan yoldaşlıq görüşünün ləğvinə münasibət bildirib.
BFF-in mətbuat katibi Aleksandr Tomin Lent.az-a açıqlamasında Azərbaycan tərəfinin yoldaşlıq görüşündən imtinasını anlaşılmaz qarşıladıqlarını söyləyib.
Tomin deyib: “Başa düşmürük ki, nəyə görə müqavilə bağlamışdılar və sonradan nəyə görə pozdular. Bizə heç bir səbəb göstərməyiblər. Sadəcə, rəsmi məktub idi. Amma məktubda müqavilənin pozulmasının konkret səbəbi göstərilməmişdi. Elə isə müqaviləni pozmaqda məqsəd nə idi? Müqavilə bağlanıbsa, yerinə yetirmək lazımdır”.
Mətbuat katibi bildirib ki, BFF gələcəkdə yığmalar səviyyəsində görüş təklifinə ehtiyatla yanaşacaq.
Qeyd edək ki, Belarusla yoldaşlıq görüşü yığmamızın baş məşqçisi Berti Foqts tərəfindən ləğv olunub. Səbəb kimi millimizin üzvlərinin əsasən Unibank Premyer Liqasının aparıcı klublarında çıxış etməsi və həmin klubların avrokuboklarda mübarizə aparacağı, Belarus yığması ilə yoldaşlıq oyununun avrokubok qarşılaşmaları ərəfəsinə təsadüf etməsi göstərilib.
