Edinson Kavani futbolla vidalaşdı
29.12.2025 , 13:50
Uruqvaylı ulduz hücumçu Edinson Kavani peşəkar futbolçu karyerasını rəsmən başa vurduğunu açıqlayıb.
Korner.az xəbər verir ki, 38 yaşlı futbolçu bu qərarını şəxsi sosial şəbəkə hesabında paylaşıb.
Təcrübəli forvard futbolun ona yalnız idman deyil, həm də həyat məktəbi olduğunu bildirib. Kavani qeyd edib ki, bu yol ona mübarizə ruhu qazandırıb, çətin anlarda ayaqda qalmağı və hər addımın dəyərini bilməyi öyrədib. Uşaqlıq arzularını gerçəkləşdirdiyini vurğulayan futbolçu ailəsinə, yaxınlarına, komanda yoldaşlarına, məşqçilərinə və azarkeşlərə minnətdarlığını ifadə edib:
“Getdiyim hər ölkədə və oynadığım hər klubda azarkeşlərin sevgisini hiss etdim. Bu sevgi mənim üçün həmişə dəyərli olacaq. Futboldan vicdanım rahat şəkildə ayrılıram, çünki hər zaman əlimdən gələnin ən yaxşısını etməyə çalışdım”.
Karyerasının son mərhələsində Argentinanın “Boka Xuniors” klubunda çıxış edən hücumçu Avropada “Palermo”, “Napoli”, PSJ, “Mançester Yunayted” və “Valensiya” formalarını geyinib. O, Uruqvay millisində 2008–2022-ci illər ərzində 136 oyunda 58 dəfə fərqlənib.
