Eddi Hau: “Qarabağ”la oyun “Nyukasl” üçün ciddi sınaq olacaq
17.02.2026 , 21:00
İngiltərə təmsilçisi “Nyukasl”ın baş məşqçisi Eddi Hau Çempionlar Liqasının pley-off mərhələsində “Qarabağ”a qarşı keçiriləcək ilk görüşdən öncə mətbuat qarşısına çıxıb.
Korner.az xəbər verir ki, Hau rəqibin oyun keyfiyyətinə diqqət çəkərək Azərbaycan çempionunun matçlarını detallı şəkildə izlədiklərini söyləyib. Onun sözlərinə görə, “Qarabağ” sabit və sürətli futbol oynayan komandadır:
“Rəqibin çıxışlarını analiz etmişik. Onların oyunu kifayət qədər sistemlidir və yüksək temp üzərində qurulub. Xüsusilə ”Çelsi” ilə qarşılaşmaları bunu açıq şəkildə göstərir. Asan matç olmayacağını anlayırıq”.
“Nyukasl”ın çalışdırıcısı pley-off mərhələsində nəticənin böyük əhəmiyyət daşıdığını vurğulayıb. O, uzun səfər və sıx təqvimə baxmayaraq, Bakıya iddialı gəldiklərini bildirib:
“Bu mərhələdə hər detal önəmlidir. Yolumuz uzun olub, üstəlik, ardıcıl oyunlar keçiririk. Buna baxmayaraq, məqsədimiz meydandan istədiyimiz nəticə ilə ayrılmaqdır”.
Hau heyətdə zədə səbəbindən itkilərin olduğunu da gizlətməyib və bəzi futbolçuların sabahkı qarşılaşmada forma geyinməyəcəyini deyib. Eyni zamanda o, rəqib komandanın baş məşqçisi Qurban Qurbanov haqqında müsbət fikirlər səsləndirib:
“Qurban Qurbanovun illərdir eyni komandaya rəhbərlik etməsi təsadüfi deyil. Onun qurduğu kollektiv intizamlı və keyfiyyətli futbol nümayiş etdirir. Xüsusilə cinah oyunçuları çox sürətlidir və bu, komandaya əlavə təhlükə yaradır”.
Qeyd edək ki, “Qarabağ” – “Nyukasl” oyunu sabah Tofiq Bəhramov adına Respublika stadionunda keçiriləcək. Qarşılaşmaya saat 21:45-də start veriləcək.
