Real” və “Barselona” komandalarının görüşünü müxtəlif cür adlandırırlar ki, onların da ən məşhuru “El klassiko” deyimidir.
Bəziləri bu oyunu “Derbilər derbisi”, bəzisi ən sadə şəkildə “İspaniya derbisi” kimi xarakterizə edir. İki nəhəng klubun görüşünü kimsə “Dünya derbisi”, yaxud matçın keçirildiyi günü “Dünya derbisi günü” adlandırsa, qətiyyən qınaq obyekti olmayacaq. Səbəbi aydındır, Kral klubu ilə kataloniyalıların mübarizəsi fitbol keyfiyyətlərinin, futbol anlamının, məfkurəsinin zirvələrindən biridir.
Azarkeşlər üçün daha bir “El klassiko” həyəcanının yaşanacağı gün yetişib – bu gün Bakı vaxtı ilə saat 21-də Madriddə, Santyaqo Bernabeu adına stadionda dünyaca məşhur iki klub yenidən üz-üzə gələcək – 229-cu dəfə. 1902-ci ildən bu yana, keçirilmiş görüşlərin 91-də “Real”, 89-da “Barselona” qalib gəlib, 48 halda isə bərabərlik qeydə alınıb. Madridlilərin vurduğu 385 qola katalonların cavabı 372 topdur. Bu, bütün turnirlər üzrə göstəricidir.
Ayrı-ayrı kateqoriyalar üzrə göstəricilər isə belədir:
(“Real” – “Barselona”)
– İspaniya çempionatı: +70=32-66, toplar 274-265
– İspaniya kuboku: +12=7-15, toplar 65-66
– İspaniya liqa kuboku: +0=4-2, toplar 8-14
– İspaniya superkuboku: +6=2-4, toplar 25-17
– UEFA Çempionlar Liqası: +3=3-2, toplar 13-10
Bundan başqa, klublar 31 dəfə yoldaşlıq matçlarında qarşılaşıblar ki, barışmaz rəqiblərin “dostluq” oyunlarının 4-də “Real”, 18-də “Barselona” üstün olub. Təbii ki, burada topların nisbəti də katalonların xeyrinədir – 78-35.
Titulların ümumi sayında “Barselona”nın üstünlüyü nəzərə çarpır – bütün turnirlər nəzərə alınmaqla katalonlar 78, Kral klubu 75 yarışın qalibi olub.
Bütün futbol azarkeşləri, “El klassiko” gününüz mübarək. Hamınıza gözəl futbol axşamı, pərəstiş etdiyiniz komandanın zəfərinin sevincini yaşamağı arzusu ilə…
(Bakusport)
