Üzgüçülük üzrə norveçli dünya çempionu Aleksandr Dal Oen dünyasını dəyişib. Korner.az-ın məlumatına görə, idmançı ürək tutmasından keçinib. 26 yaşlı üzgüçünü Arizona ştatının Flaqstaff şəhərində məşqdən sonra duş kabinəsində ölü halda aşkarlayıblar. Əvvəllər Dal Oen səhhətindən şikayətlənməyib.
Qeyd edək ki, Aleksandr Dal Oen dünya çempionluğunu 2011-ci ildə Çinin Şanxay şəhərində 100 metr məsafəyə brass üsulu ilə üzmədə əldə edib. Daha öncə isə o, 2008-ci il Pekin Yay Olimpiya Oyunlarında eyni məsafədə gümüş medala sahib olub.
