Dünən koronavirusa yoluxub dedikləri kapitan bu gün qəlyan çəkir? – FOTO
03.06.2025 , 17:11
Dünən Azərbaycan Prezidenti İlham Əliyev Bakıda keçirilmiş Minifutbol üzrə Dünya Çempionatının qalibi olan milli komandanın üzvlərini qəbul edib. Lakin bu əlamətdar və tarixi görüşdə komandanın üç üzvü – kapitan Elvin Əlizadə, hücumçu Samir Həmzəyev və köməkçi-məşqçi Sərxan Məstiyev iştirak etməyiblər.
Mətbuata verilən açıqlamaya görə, Dünya Çempionatının final oyunundan sonra həmin şəxslərdən götürülmüş koronavirus testlərinin nəticələri müsbət çıxıb. Bu səbəbdən onların rəsmi qəbulda iştirak etmədikləri bildirilib.
Lakin bu gün mətbuatda yayılan bir foto geniş ictimai müzakirəyə səbəb olub. Sözügedən fotoda komandanın kapitanı Elvin Əlizadə bir qrup şəxslə birlikdə qəlyan məclisində əyləşmiş şəkildə əks olunub. Bu, haqlı olaraq ciddi suallar doğurub: əgər kapitan rəsmi tədbirə koronavirusa yoluxduğu üçün qatılmayıbsa, bəs bir gün sonra ictimai məkanda, qəlyanla görüntülənməsi necə izah olunmalıdır?
Ortaya iki ehtimal çıxır: ya test nəticəsi bəhanə kimi göstərilib, ya da yoluxma gerçəkdirsə, bu halda ictimai məsuliyyət və təhlükəsizlik qaydaları kobud şəkildə pozulub. Hər iki halda vəziyyət ciddi narahatlıq doğurur və cəmiyyətə aydın və şəffaf açıqlamanın verilməsi zərurətini ortaya çıxarır.
Ən önəmli məqamlardan biri də odur ki, hələlik Azərbaycan Minifutbol Federasiyası bu məsələ ilə bağlı rəsmi mövqe bildirməyib. Nə səbəbdən bu qədər diqqət çəkən və ictimai maraq doğuran məsələyə dair aydınlıq gətirilmir? Şəffaflıq prinsiplərinə uyğun olaraq əsas sual cavabını gözləyir: kim nəyi və niyə gizlədir?
Korner.az
