De Byazi: “Şərəflə əlimizdən gələni etməyə çalışacağıq”
26.03.2023 , 20:45
“İsveçi yaxşı analiz etmişik, hansı sistemlə oynadığını bilirik”.
Korner.az xəbər verir ki, bu sözləri Azərbaycan millisinin baş məşqçisi Canni de Byazi deyib. O, Avro-2024-ün seçmə mərhələsində İsveçlə matçdan öncə təşkil olunan mətbuat konfransında rəqibin güclü olduğunu vurğulayıb:
“Heyətlərində İbrahimoviç, Kuluşevski kimi məşhur oyunçular var. İsveçin ilk oyunda Belçikaya məğlub olması komanda üzərində təzyiq yaradıb. Reytinqdə 23-cü yerdə gedən komandaya qarşı oynayacağıq”.
Mütəxəssis ən yaxşı oyunlarını göstərmək istədiklərini deyib: “Təbii ki, özümüzdən çox şey asılıdır. Mən komandama güvənirəm. Həyatda nəyəsə nail olmaq istəyirsənsə, çox çalışmaq lazımdır. Şərəflə əlimizdən gələni etməyə çalışacağıq. Son matçdan dərs çıxarmalı, sabah ən yaxşı oyunumuzu göstərməliyik. Öz yolumuzla getməyə davam edəcəyik”.
Sabah Solna şəhərindəki “Frends Arena”da keçiriləcək İsveç – Azərbaycan oyununa Bakı vaxtı ilə saat 22:45-də start veriləcək.
