Sabah Avropa Liqasının pley-off mərhələsində “Qəbələ” “Maribor”u qəbul edəcək.
Korner.az-ın məlumatına görə, oyundan öncə “Maribor”un baş məşqçisi Darko Milaniç bunları deyib:
“Bizim məqsədimiz elə bir nəticə əldə etməkdir ki, qrup mərhələsinə vəsiqə qazanaq. Əvvəlcədən demək çətindir, amma səfər qolu vurmaq yaxşı olardı. Rəqibimizi tanıyırıq. Təsadüf nəticəsində bura gəlməyiblər. Artıq özlərini Avropada möhkəmlədiblər.
Rəqib bəlli olduqdan sonra artıq onu dəyişdirə bilməzsiniz. İstənilən rəqibə qarşı hazırlanmaq lazımdır. Qalib gəlmək üçün həll yolları axtarmalıyıq. “Qəbələ”ni keçə bilərik.
Komandanın idman direktoru Zahoviç çempionatın oyunu izləyib. Amma həmin matçda legionerlər az idi. Amma “Qəbələ”nin heyətində Ozobiçdən də güclü futbolçular var. Onlardan ikisi yerlidir.
Bütün komandaya fikrimizi kökləyəcəyik. Öz strategiyamızı müəyyən etməliyik. Oyunu biz idarə etməliyik. Matçın gedişatından aslı olaraq müəyyən şeylər edəcəyik. Sadəcə müdafiə olmağa gəlməmişik. Komandamız hücum futbolu oynayır”.
“Maribor”un futbolçusu Rodriqo Defendi isə bunları deyib: “Oyuna çox ciddi hazırlaşırıq. Əlimizdən gələni edirik ki, evə sərfəli nəticə ilə dönək. İsti havanın bizə təsir edəcəyini düşünmürəm. Sloveniyada da hava şəraiti eynidir. Meydana çıxıb futbolumuzu oynayacağıq.
Vəfat edən futbolçular da dostlarımız idi. Ancaq işimizə davam etməliyik. Avropa Liqasında asan oyun yoxdur. Sabahkı oyun da asan olmayacaq. Özümüzü göstərməliyik. Rəqibimiz fərqli komandadır. Onlara qarşı hazırlıqlı olmalıyıq”.
