“Mən Sadıq Sadıqov “Neftçi”yə prezident təyin edildikdən sonra bu kluba dəvət olunmuşam. Klubda uzun müddət Mətbuat Departamentinin əlaqələndiricisi vəzifəsində çalışmışam. Biz kluba gələndə “Neftçi”nin işçiləri yeməklə təmin edilmirdi”.
Bu sözləri Korner.az-a açıqlamasında “ağ-qaralar”ın sabiq rəsmisi Araz Əhmədov bildirib.
Əhmədov qeyd edib ki, S.Sadıqov kluba prezident təyin edilənədək ancaq futbolçular yeməklə təmin olunublar: “Yalnız futbolçular bazanın yeməkxanasında nahar edirdilər. Sadıq müəllim gələndən sonra göstəriş verdi ki, bundan sonra bütün işçilər naharla təmin edilsin. Yəni bu ənənə Sadıq Sadıqovun gəlişindən sonra qoyulub. Mən işlədiyim dövrdə bu ənənə davam edirdi, mən oradan ayrıldıqdan sonra qərarın dəyişib-dəyişmədiyini bilmirəm”.
Xatırladaq ki, bugünlərdə “Neftçi”nin Müşahidə Şurasının sədri Çingiz Abdullayev feysbuk səhifəsində onun gəlişinə qədər klubun ancaq futbolçu və məşqçi heyətinin yeməklə təmin olunduğunu iddia etmiş, indi isə xadimədən tutmuş, gözətçiyə kimi, bütün işçilərə hər gün pulsuz yemək verildiyini demişdi. “Ağ-qaralar”ın sabiq vitse-prezidenti Tahir Süleymanov “Xəzər” TV-də yayımlanan “Futbol saatı” verilişində Ç.Abdullayevi yalan danışmaqda ittiham etmişdi: “Bizim dövrümüzdə “Neftçi”də çalışan bütün işçilər klubun hesabına nahar edib. Sadıq Sadıqovun dövründə “Neftçi”də çalışan istənilən adamı tapın, qoy çıxıb desin ki, bu, belə deyil. Belə bir şeyin olması mümkün deyil”.
