Cek Uilşir məşqçilikdə yeni səhifə açdı: “Luton Taun”u çalışdıracaq
13.10.2025 , 15:00
“Arsenal”ın sabiq yarımmüdafiəçisi Cek Uilşir futbolçu karyerasını bitirdikdən sonra məşqçilik sahəsində yeni addımlar atır.
Korner.az xarici KİV-ə istinadən xəbər verir ki, 33 yaşlı mütəxəssis İngiltərənin birinci liqasında (üçüncü divizion) çıxış edən “Luton Taun” klubunun baş məşqçisi postunu qəbul edib. Tərəflər əməkdaşlığın bütün şərtlərində razılığa gəlib və rəsmi açıqlamanın gün ərzində verilməsi gözlənilir.
Uilşir 2022-ci ildə futbolçu karyerasını başa vurub. Peşəkar oyunçu kimi uzun illər “Arsenal”ın və İngiltərə millisinin formasını geyinmiş Uilşir, ardından məşqçilik fəaliyyətinə başlayıb. O, əvvəlcə “Arsenal”ın gənclər komandasına rəhbərlik edib, 2024-cü ilin oktyabrından 2025-ci ilin mayına qədər isə “Norviç” klubunda baş məşqçinin köməkçisi kimi çalışıb. Bu müddət ərzində gənc mütəxəssis komanda idarəçiliyi və taktiki planlaşdırma sahəsində təcrübəsini artırıb.
“Luton Taun” hazırda İngiltərənin birinci liqasında turnir cədvəlinin 11-ci pilləsində qərarlaşıb. Komanda ötən mövsüm Çempionşipdən, ondan əvvəlki il isə Premyer Liqadan aşağı liqaya düşmüşdü. Uilşirin təyinatı klub üçün yeni ümidlər yaradır və onun rəhbərliyi altında komandaya yüksəliş imkanı verəcəyi gözlənilir.
