Azərbaycan Premyer Liqasının XV turunda baş tutan "Qarabağ" – "Neftçi" oyunu 1:1 hesablı bərabərliklə başa çatıb.
Korner.az-ın məlumatına görə, oyundan sonra "Neftçi"nin futbolçusu Cavid İmamverdiyev jurnalistlərin suallarını cavablandırıb:
Çox gərgin oyun oldu. Bu, Azərbaycanın ən yaxşı oyunlarından biri idi. Düşünürəm ki, yaxşı mübarizə apardıq. Qələbə qazana biləcəyimiz oyun idi. Bilmirəm penalti var idi, yoxsa yox. Amma qələbə qazanmalı idik. Qol epizodlarımız olsa da, dəyərləndirə bilmədik.
– Komanda ikinci hissədə niyə dayandı?
– Komandamız dayanmadı. Sadəcə, məşqçimiz tapşırıq verdi ki, rəqibi müdafiədə qabaqlamalıyıq. Müəyyən qədər də yorğunluq oldu. İstər-istəməz, komanda tam oturmayıb, bir-birimizi yaxından tanımırıq. İnşallah gələcək oyunlarda oyunumuz daha yaxşı alınacaq, "Neftçi" əvvəlki gücünü qaytara biləcək. Mən bu komandaya inanıram.
– Penalti epizodları barədə nə deyə bilərsən?
– Rəhman Hacıyevin epizodunda təmiz cərimə zərbəsi var idi. Bunu gözümlə gördüm. Ancaq qapımıza təyin olunan penalti haqda heç nə deyə bilmirəm. Çünki yaxın deyildim, görə bilmədim.
– Bu gün hiss olunurdu ki, komanda özünü sübut etməyə çalışır…
– Fikirləşmirəm ki, bu, pis nəticədi. İlk oyunu heç-heçə bitirmək yaxşı nəticədi. Qarşıdakı oyunlarımız var və özümüzü daha da toparlamağa çalışacağıq.
– Bizim gözlədiyimiz "Neftçi" budur, yoxsa?
– Əlbəttə ki, yox. "Neftçi" həmişə iddialı komanda kimi tanınıb. Potensialımız var, qarşıdakı oyunlarda da yaxşı oyanayacağımızı görəcəksiniz. Məşqçilərimiz də bizə inanırlar. Onların inamını itirməməyə çalışacağıq.
