Buffon onları dünyanın ən yaxşı qapıçıları hesab edir
12.05.2023 , 10:26
Hazırda “Parma”da çıxış edən əfsanəvi italiyalı qapıçı Canluici Buffon dünyanın ən yaxşı qapıçılarının adlarını çəkib.
Korner.az-ın xəbərinə görə, onlardan biri özünün həmyerlisidir.
“Mənim üçün ən yaxşı qapıçılar Oblak, Kurtua, Donnarumma və Maynqandır”, – deyə Buffon bildirib.
Oblak “Atletiko”da (Madrid), Kurtua “Real”da (Madrid), Donnarumma PSJ-də, Maynqan isə “Milan”da çıxış edir.
45 yaşlı Buffon bu mövsüm B Seriyasında “Parma”nın heyətində 16 oyuna çıxıb, 21 qol buraxıb, dörd görüşdə isə qapısını toxunulmaz saxlayıb. Onun “Parma” ilə müqaviləsi gələn yaya qədərdir.
