“Neftçi”nin baş məşqçisi Böyükağa Hacıyev komandanın Avropa Liqasındakı rəqiblərinin çıxışlarına münasibət bildirib.
Korner.az-ın məlumatına görə, klubun saytına açıqlamasında o deyib ki, dünən onlarla eyni qrupda mübarizə aparmış “Rubin” və “İnter”in oyunlarını izləyib.
“Hər iki klub qazandıqları qələbə ilə yarışdakı iddialarını nümayiş etdirdilər. Qrupumuzdan növbəti mərhələyə vəsiqə qazanmış “Rubin” səfərdə “Atletiko”nu məğlub etdi. İspaniya komandasının gücündən danışmaq məncə artıq olar. Bu cür yarımmüdafiə və hücum xətti olan komanda “Rubin”lə görüşdə fərqlənə bilmədi. “İnter” də elə ilk oyunda cütün taleyini demək olar ki həll etdi. Bu həmin “İnter”diki, “Neftçi” onunla səfər matçinda 2-2 hesablı heç-heçəyə nail olmuşdu. Hətta mən deyərdim ki, İtaliya təmsilçisi yarışın favoritidir. İndi soyuq başla müqayisə edəndə görünür ki, biz hansı gücdə olan rəqiblərlə qarşılaşmışıq və layiqli mübarizə aparmışıq”.
