Bu gün 4 idmançımız mübarizə aparacaq
06.08.2024 , 09:45
Bu gün Paris-2024 Yay Olimpiya Oyunlarında 10-cu gündür.
Korner.az xəbər verir ki, bu gün Azərbaycanın 4 idmançısı yarışda mübarizə aparacaq.
Güləş
50 kq
Bu gün qadın güləşçimiz Mariya Stadnik 1/8 finalda xalça üzərinə çıxacaq. İkiqat dünya, doqquzqat Avropa çempionu, Olimpiya Oyunlarının ikiqat gümüş, ikiqat bürünc mükafatçısı, Avropa Oyunlarının ikiqat qalibi olan Mariya B xalçasının 9-cu görüşündə Almaniya təmsilçisi Anastasiya Blayvas ilə qarşılaşacaq. A.Blayvas dünya və Avropa çempionatının bürünc mükafatçısıdır.
Qadınların güləş yarışları saat 13:00-da başlayacaq.
77 kq
Yunan-Roma güləşçimiz Sənan Süleymanov da bu gün 1/8 finaldan mübarizəyə başlayacaq. A xalçasının 10-cu görüşündə Sənanın rəqibi Bolqarıstanı təmsil edən, erməni əsilli Aik Mnatsakanyan olacaq. Sənan Süleymanov dünya çempionatının ikiqat gümüş mükafatçısı, Avropa çemponudur. O, qitə çempionatında 2 dəfə bürünc medal da qazanıb. Aik Mnatsakanyan isə həm dünya çempionatlarında, həm də Avropa çempionatlarında iki dəfə bürünc medala yiyələnib.
Yunan-Roma güləşi üzrə yarışlar saat 13:00-da start götürəcək.
130 kq
Azərbaycan təmsilçisi Sabah Şəriəti bu gün bürünc medal uğrunda güləşəcək. O, Amin Mirzəzadə (İran) – Seunqçan Li (Koreya) görüşünün qalibi ilə qarşılaşacaq.
Üçüncü yer uğrunda görüşlər saat 20:15-də başlayacaq.
Çəkicatma
Azərbaycan çəkicatanı Anna Skidan isə finalda qüvvəsini sınayacaq. Təsnifat mərhələsində 32 atlet arasında 6-cı yeri tutaraq finala vəsiqə əldə edən Anna medal uğrunda yarışacaq. Həlledici mərhələdə 12 idmançı çıxış edəcək.
Mübarizəyə Bakı vaxtı ilə saat 21:50-də start veriləcək.
