“Bu, Azərbaycanda hələ də peşəkar futbol olmamağını təsdiq edir”. Bu sözlər “Xəzər Lənkəran”ın fəxri-prezidenti, “Palmali” Şirkətlər Qrupunun sahibi Mübariz Mənsimova aiddi. Əbəs yərə deməmişdi…
Məlum məsələnin ardından “Xəzər Lənkəran”ın aktivindən 6 xal silindikdən sonra Azərbaycan futboluna cavabdehlik daşıyan AFFA “sizə kömək edərik” deyib bir klubu rahatlaşdırdı, əminlik yaratdı. Ancaq sadəcə dildə, əməldə yox. Nə kömək, nə yardım…? AFFA rəsmiləri susdu, son məqamda klubu selin axarına buraxdı. Niyə və nə səbəbə o boyda qurum “Xəzər Lənkəran”a arxa durmadı?
“Niyələr” və “səbəblər” bir daha isbatladı ki, ayrı-seçkilik, qeyri-peşəkarlıq var. Olub və bu gedişlə yenə olacaq.
Silinən 6 xal “Xəzər Lənkəran”ın şikayəti, İdman Arbitraj Məhkəməsinin təkidi, FİFA-nın qərarı ilə qaytarıldı. Məsələnin başqa önəmli tərəfləri də var. Bir klub iki qurum üzərində iki qələbə qazanaraq, hər iki mübarizədən üç xalla ayrılıb aktivinə altı xalı yazdırdı. Əslində, bunun reallaşacağına ümidlər var idi.
Çünki Cənub təmsilçisinin sahibi Mübariz Mənsimov bir neçə gün bundan öncə verdiyi müsahibədə gec-tez haqq-ədalətin bərqərar olunacağını, silinən 6 xalın gerdi qayıdacağının eyhamını vurmuşdu. “Ağ-yaşıllar”ın sahibi Mübariz Mənsimov: “Mən FİFA-nın qərarını tamamilə birtərəfli hesab edirəm. İnşallah, onu da hər kəs görəcək. “Xəzər Lənkəran” Beynəlxalq İdman Arbitraj Məhkəməsinə (CAS) müraciət edib, orada da “Xəzər Lənkəran”ın xeyrinə çıxarılan qərarı hər kəs görəcək” – deyə vurğulamışdı. Başqanı bu cür iddialı açıqlama verməyə sövq edən isə, heç şübhəsiz, məsələ ortaya çıxan gündən bu işlə yaxından və gərgin işləyən komandasına duyduğu güvən idi. Mənsimov bilirdi ki, qərar qarşısında acizlik nümayiş etdirən AFFA-dan fərqli olaraq, onun komandası bu işin öhdəsindən gələ biləcək və ədalət bərqərar olunacaq. Bunlar heç də pafosla söylənilmiş sözlər deyildi. Zaman və sonluq haqlı tərəfi də göstərdi, ağzına su alıb oturan tərəfi də.
“Xəzər Lənkəran” bununla ikinci dəfədi ki, başına açılan oyundan təkbaşına qalib çıxır. Bununla həm imicini qoruyur, həm nümunə olur, həm də birilərinə “sizin aylarla öhdəsindən gələ bilmədiyiniz işi biz 1 həftəyə də həll edərik” ismarıcı göndərir. Göndərir, amma… Əcəba o ismarıc ünvanına çatırmı?
