Topaz Premyer Liqasının 20-ci turu çərçivəsində keçirilən “Kəpəz” – AZAL qarşılaşmasından sonra qonaq komandanın baş məşqçisi Tərlan Əhmədovun iştirakı ilə mətbuat konfransı keçirilib.
Korner.az-ın “futbolinfo.az”a istinadən yaydığı xəbərə görə, baş məşqçi ilk növbədə meydançanın durumundan gileylənib
“Əgər bu cür meydançada oyun keçirilməsinə icazə verilirsə, deməli, ilk 5 oyunda bizə qarşı haqsızlıq olub. Bizim meydanın qənaətbəxş olmadığını söyləyib, stadionumuzdan didərgin salmışdılarsa, “Kəpəz”ə də evdə bu oyunu keçirməyə icazə verilməməli idi” – deyə o qeyd edib.
Daha sonra T. Əhmədov komandasından razı qaldığını bildirib: “Rəqibi qələbə münasibəti ilə təbrik edirəm. Bu cür meydançada futboldan söhbət gedə bilməzdi. Belədə, ön plana bəxt amili çıxmalı idi və bu dəfə xoşbəxtlik Gəncə təmsilçisinin üzünə güldü. Yetirmələrinmdən heç bir narazılığım yoxdu. Onlar əllərindən gələnin ən yaxşısını etdilər”.
Qeyd edək ki, “Kəpəz” – AZAL matçı 2:0 hesabı ilə meydan sahiblərinin xeyrinə başa çatıb.
