“Bu cür futbolçularım olduğuna görə fəxr edirəm” – Roberto Bordin
11.03.2019 , 08:31
“Komandamın oyunundan razı qaldım. Futbolçularım sona qədər mübarizə apardılar, əzmkarlıq göstərdilər. Bu cür futbolçularım olduğuna görə fəxr edirəm. Onları qələbə qazandıqlarına görə təbrik edirəm”. Bu sözləri “Neftçi”nin baş məşqçisi Roberto Bordin deyib.
“Ağ-qaralar” Azərbaycan Premyer Liqasının XX turunda səfərdə “Sumqayıt” üzərində əzmkar qələbə qazanıb.
Oyundan sonra baş tutan mətbuat konfransında iştirak edən italiyalı çalışdırıcı fikirlərini bildirib: “İlk pillədə olmağımız növbəti oyunlara psixoloji təzyiq yaratmayacaq. Bu gün qələbəni qeyd edəcəyik, sabahdan isə növbəti oyunun hazırlıqlarına başlayacağıq. Vaxtımız yoxdur”.
Mütəxəssis Mamadu Mbodjun ilk hissədəki zəif oyunundan danışıb: “Əlbəttə, buraxdığımız qolda Mbodjla Səlahət Ağayev arasında anlaşılmazlıq baş verdi. Bu, hər bir futbolçunun başına gələ bilər. Əsas odur ki, özünü toparladı və vacib qol vurmağı bacardı”.
