“Neftçi” Avroliqanın qrup mərhələsində son oyununu keçirəcəyi İtaliyaya dekabrın 5-də yollanacaq.
Korner.az-ın apasport.az-a istinadən məlumatına görə, təmsilçimiz “İnter”lə matça 1 gün qalmış səfərə çıxacaq. Bunu əvvəl də olduğu kimi, çarter reysi ilə edəcək bakılıların saat 10:00-da yola düşəcəyi gözlənilir.
Komandamızı aparan təyyarə İtaliyaya 4 saatlıq yol edərək, Varezi şəhərində enəcək. Oradan Milana yollanmaq üçün avtobusla 1 saatlıq yol qət ediləcək. “Neftçi” bu şəhərdə beş ulduzlu “Ramada” otelində qalacaq.
“Neftçi”nin məşhur “San-Siro” stadionda məşq vaxtının və mətbuat konfransının da vaxtı artıq təsdiqlənib. Belə ki, yerli vaxtla saat 18:30-da (Bakı vaxtilə 21:30-da) jurnalistlər qarşısına çıxacaq komandanın baş məşqçisi Böyükağa Hacıyev bundan 30 dəqiqə sonra futbolçuları hazırlığa çıxaracaq. “İnter”in açıq məşqinin bundan sonra olacağı gözlənilir.
Qeyd edək ki, “Neftçi” “İnter”lə dekabrın 6-da yerli vaxtla saat 21:05-da başlayacaq matçın ertəsi Vətənə dönəcək. Komanda yerli vaxtla saat 11:00-da İtaliyadan Bakıya üz tutacaq.
