Böyükağa Hacıyev “Rubin” – “Neftçi” oyunundan əvvəl mətbuat konfransı keçirib. Mətbuat konfransında komandanın futbolçuları Nikolas Kanales və Tərlan Quliyev də iştirak edib.
– “Gəncə”ylə oyundan sonra komanda bir müddət istirahət edib. Ayın 21-dən etibarən isə bu oyuna hazırlığa başlamışıq. 4 gün ərzində “Rubin”lə görüşə maksimal hazırlıq keçmişik.
– “Rubin” Rusiya Premyer Liqasında son vaxtlar uğursuz çıxış edir. Bu, “Neftçi”nin xeyrinə olacaqmı?
– Unutmayın ki, “Rubin” iki dəfə Rusiya çempionu olub. Qurban Berdıyev yaxşı komanda yaradıb.
– Mətbuat konfransından əvvəl elan edildi ki, “Neftçi”nin məşqinin tamamı jurnalistlər üçün açıq olacaq.
– “Neftçi”nin məşqləri heç vaxt qapalı hazırlıq keçməyib. Mən elə bilirəm ki, başqa yerə gələndə öz məşqini göstərməlisən, jurnalistlər görməlisiniz. Bugünkü məşqdə nə ev tapşırıqları, nə də taktiki məşqlər olmayacaq. Biz oyunlara öz bazamızda il boyunca hazırlaşırıq.
– Mətbuat konfransında Tərlan Quliyevin iştirak etməsi sabahkı oyunda heyətdə dəyişiklik olacağına işarədi?
– “Neftçi”də bir deyil, 7 gənc oyunçu var ki, milli komandalara dəvət alır. Cavidə, Mirhüseynə imkan yaratmaq lazımdı. Biz bu uşaqlara geniş meydan vermişik. İndi də onlara şans verməsək, nə vaxt verəcəyik?
– 36 ildən sonra komandalar üz-üzə gəlir. əvvəlki 4 oyundan 3-də “Neftçi” qalib gəlib. Bir oyun isə heç-heçə bitib.
– Sabahkı oyun da tarixi oyundu. Vaxtilə mən özüm də “Rubin”ə qarşı, Qurban Berdıyevə qarşı çox oynamışam. Amma unutmayın ki, zaman dəyişir. Bu gün futbolun siması başqadı, proqnoz vermək çətindi. Ancaq bir şeyi tam məsuliyyətimlə deyirəm ki, buraya uduzmağa gəlməmişik.
– Sual Kanalesədi. Azərbaycan Premyer Liqasının son turunda “Kəpəz”ə 2 qol vurdunuz. Ancaq aydın məsələdi ki, “Rubin”in müdafiəsi “Kəpəz”in müdafiəsi kimi deyil. Rəqib müdafiəçiləri analiz etmisizmi?
– “Rubin” güclü komandadı. Onların oyununu analiz etmişik. “İnter”in də müdafiəsi zəif deyildi, ancaq o komandaya da qol vurduq. Buna görə də düşünürəm ki, sabahkı oyunda da qol vura biləcəyik.
– Böyükağa müəllim, hava şəraiti “Neftçi“nin oyununa mənfi təsir edə bilərmi?
– Təəssüf ki, Böyükağa Hacıyev təbiətlə mübarizə aparmaq gücündə deyil. Rusiyada onlarla braziliyalı futbolçu oynayır. İnsan düşdüyü mühitə öyrəşməlidi.
– Tərlan, “Rubin”in hücum xəttində kimi xüsusilə qeyd edərdin?
– Solomon Rondon.
– Bir həftə bundan əvvəl Rusiya millisi ilə oyunda yığmamız müdafiə futbolu oynadı
– Azərbaycan millisini Berti Foqts çalışdırır. Bugünkü “Neftçi”ni isə Böyükağa Hacıyev çalışdırır. İlyarım ərzində görmüsüzmü müdafiədən oynayaq? Mən “İnter”ə qarşı da müdafiə futbolu oynatmadım. Əsl kişi qorxmaz. Kişini qadından fərqləndirən əsas xüsusiyyət də budu.
– Rəqibin heyətində xüsusi qeyd edə biləcəyiniz futbolçu kimdi və ona qarşı nə tədbir görəcəksiz?
– Bu gün mən “Rubin”i “Neftçi”dən yaxşı tanıyıram. 20 gündü bu komandanın 7-8 oyununu izləmişəm. Yarımmüdafiə xətti xoşuma gəlir. Hücumda Rondonu qeyd etmək lazımdı. Hər bir baş məşqçi əlinin altında belə hücumçunun olmasını istəyər. “Rubin” artıq baxımlı oyun göstərir. Komandanın 8-ci yerə olmasının səbəbi isə odu ki, əvəl müdafiədən oynayırdı. Berdıyev necə oynayırdısa, elə də komanda çalışdırır. Çox yaxşı heyət formalaşdırıb.
– Stamaççoni və Berdıyev – hansını futbolda bayaq qeyd etdiyiniz şəkildə kişi adlandırmaq olar?
– Birmənalı şəkildə Qurban Berdıyev. Çünki onları müqayisə etmək mümkün deyil. Bir adam komandanı 12 il çalışdıran adamı ancaq Aleks Fergüssonla müqayisə etmək olar.
– Cavid İmamverdiyev bu oyunda da olmayacaq. “İnter”lə görüşdə Kamili sınadız. Bu dəfə də onu meydana buraxacaqsız, yoxsa taktiki dəyişiklik edəcəksiz?
– Bizdə əvəzedilməz oyunçu yoxdu. “İnter”lə oyunda Kamilin vəzifəsi zonaları qapatmaq idi. O da işinin öhdəsindən gəldi. Həmin mövqedə Mirhüseyn Seyidov da oynayır. Mən sonuncu məşqdə onların durumuna bir də baxacam və qərarımı verəcəm.
– Bahodir Nasimovu “Rubin”dən aldız və Azərbaycanda bombardir oldu. Ümumiyyətlə, “Neftçi” belə oyunçuları indi də ala biləcək gücdədimi. Maddi baxımdan Azərbaycan klublarını hansı MDB ölkəsi ilə müqayisə edə bilərsiz?
– Bahodir Nasimov mən təyin olunana qədər mütəmadi oynamırdı. Ancaq mən gələndən sonra ona tam sərbəstlik verdim. Düzdü, indi o, əməliyyat olunub, yeni-yeni özünə gəlir. Biz ondan razıyıq. Və əminəm ki, sabahkı oyunda mən onu Nikolasla birgə meydana buraxsam, onların qarşısında heç bir müdafiə xətti dura bilməz. Nasimovu bu yaxınlarda klublardan biri 1,5 milyon dollara istəyirdilər.
Azərbaycan Prezidenti İlham Əliyevin diqqət və qayğısı sayəsində ölkəmizdə idmanın bütün növləri kimi, futbol da inkişaf edir. Prezidentimiz idmanı çox sevir. Maddi baxımdan hər hansı problem yoxdu, sadəcə pulları lazımi sahədə və formada xərcləmək lazımdı.
Saleh Arslan
Kazan
lehSa
