"Sabahkı "Böyük oyun"a "UltraNeftçi" fanklubu olaraq ciddi hazırlaşırıq. Stadionda bizə ayrılacaq yerlərin hamısı dolacaq".
Bu sözləri Korner.az-a açıqlamasında "UltrasNeftçi" fan klubunun rəhbəri Ceyhun Əzizli deyib.
Neftçi"nin Avropa Liqasındakı uğuru "Böyük oyun"a da daha bir rəng qatacağını bildirən C.Əzizli hər hansı bir xoşagəlməz olayın baş verməməsinə çalışacağını bildirib:
"Böyük oyun"a bir çox pankart hazırlamışıq. Öz hesabımıza fakellər də almışıq. Lakin inandırıcı deyil ki, belə yandırıcı maddələri stadiona buraxalar. Hər dəfə "Xəzər Lənkəran"la oyunda xoşagəlməz hadisələr yaşanır. Mən öz fanklubuma cavabdeh şəxs kimi deyə bilərəm ki, bu tip olayların baş verməməsinə çalışacağam. Bakıxanov qəsəbə stadionunda təhlükəsizlik tədbirləri də yüksək səviyyədə təşkil olunacaq. "Neftçi"nin Avropa Liqasının qrup mərhələsinə vəsiqə qazanması "Böyük oyun"un mahiyyətini bir az da böyütdü".