Bu gün – 28 May tarixində 20-ci Azərbaycan kubokunun final oyununda “Neftçi” və “Xəzər Lənkəran” klubları qarşılaşacaq. “Böyük Oyun” saat 20:00-da başlayacaq və “İdman Azərbaycan” kanalı ilə canlı yayımlanacaq.
Korner.az-ın məlumatına görə, azarkeşlər saat 19:00-dan etibarən Tofiq Bəhramov adına Respublika stadionunda Azərbaycan kubokunun açılış mərasimini və müğənni Röyanın iştirakı ilə möhtəşəm şou-proqramı izləyə bilərlər. Oyundan dərhal sonra isə “Chevrolet Aveo” avtomobili, smartfon və planşetlərin uduşu keçiriləcək.
Azərbaycan kubokunun “Neftçi” – “Xəzər Lənkəran” finalının ən yaxşı oyunçusu SMS səsverməsi ilə seçiləcək. Azarkeşlər bütün mobil operatorlardan 9192 qısa nömrəsinə boşluq buraxmadan komandanın baş hərfini və futbolçunun forma nömrəsini göndərməklə səsvermədə iştirak edə bilərlər.
Nümunə:
n6 x14
(Neftçi, Rəşad Sadiqov) (Xəzər Lənkəran, Rahid Əmirquliyev)
