“Çox gözəl turnirə gəldik. Öz vətənimizdəki kimiyik”.
Korner.az-ın məlumatına görə, bu sözləri Türkiyənin “Qalatasaray” klubunun (U-15) baş məşqçisi Taner Alpak deyib.
Qəbələdə keçirilən I Qəbələ kubokunun qalibi olan İstanbul təmsilçisinin çalışdırıcısı qalib olmalarına münasibət bildirib: “Bizi yarışa “Qəbələ” futbol akademiyasının direktoru Əli Yavaş dəvət etmişdi. Bu turnir ilk dəfə təşkil olunduğundan öz adımızı tarixə yazdırdığımızı düşünürəm. Bu da unudulmazdır. Hər şeyin ilki var. Gözəl turnir idi. İlk dəfə keçirilməsinə baxmayaraq, hər şey mükəmməl idi. Təbii ki, cüzi çatışmazlıqlar ola bilər. Lakin ümumilikdə çox gözəl turnir oldu. Turnirdə işlərimiz gözəl gedirdi. Təəssüf ki, ilk matçımızda oyunçularımızdan biri zədələndi. Onun çiyini qırıldı. Bu bizə üzüntü yaratdı. Sonradan uşaqlar toparlana bildilər. Matç öncəsi açıqlamalarında futbolçularımız məhz onun üçün oynayacaqlarını, bu kuboku ona həsr edəcəklərini deyirdilər. Özlərinə söz verdilər. Buna da nail oldular. Qalib olduğumuza xoşbəxtik. İlk dəfə təşkil olunan “Qəbələ kuboku”nun qalibi olduğumuz üçün çox xoşbəxtik”.
Qeyd edək ki, “Qalatasaray” finalda Serbiya millisinə penaltilərlə 4:2 hesabı ilə qalib gəlib.
