“Araz-Naxçıvan”ın gürcü legioneri David Canelidzenin müsahibəsi.
Korner.az həmin müsahibəni sizə təqdim edir:
– “Turan”dan sonra aşağı liqa komandasında oynamaq geriyə addım deyil?
– “Araz” hədəfləri olan komandadı. Məqsəd növbəti mövsümdən Premyer Liqada çıxış etməkdi. Bu kluba keçməzdən əvvəl hədəfləri ilə tanış olmuşdum.
– Demək istəyirsən ki, pulun hər hansı rolu olmayıb?
– Pul hamıya lazımdı. Ancaq ciddi məqsədlər də vacib şərtdi. Əlbəttə ki, elitanın səviyyəsi başqadı. Biz də Premyer Liqaya vəsiqə qazanmaq istəyən komandanın heyətindəyik.
– Gənc yaşda Gürcüstanı tərk edən hücumçunun qonşu ölkənin aşağı liqasında top qovmağa razılaşması vətənində necə qarşılanır?
– Gürcüstanda vəziyyət yaxşı deyil. Bu gün ölkəmdəki klubların ciddi maliyyə sıxıntısı var. Futbolçular istənilən halda özünə iş yeri tapmalıdı. Maddi durum bərbad olduğuna görə yerli oyunçular ölkədən bacardıqca tez çıxmağa can atır.
– Heç gürcü jurnalistlər səninlə əlaqə saxlayır?
– Ara-sıra zəng vurular. Oynadığım komandanın irəli can atan, inkişaf etməyi planlaşdıran, qarşısına real hədəflər qoyan kollektiv olduğunu demişəm.
– Azərbaycanda elitaya vəsiqəni haqq edən klubun Premyer Liqaya buraxılmadığını çox görmüşük. Naxçıvan təmsilçisinin önünə sədd çəksələr, “Sumqayıt”ı son pillədə qərarlaşdəğı halda yenə çempionatda saxlasalar, necə?
– Bizə deyiblər ki, haqqımız yeyilməyəcək. Yəni vəsiqəni təmin etsək, elitada oynayacağıq. Hədəfə doğru irəliləyirik.
– 19 turdan sonra ən yaxın izləyiciniz “Qaradağ”ı 9 xal qabaqlayırsız. Bu gedişlə arzunuza çatmaq şansınız çoxdu. Elitaya buraxmasalar, növbəti mövsümü də aşağı liqada keçirməyə razılaşacaqsan?
– Klubla birillik müqavilə bağlamışdım. Mayda müqaviləmin müddəti başa çatır. Açığı, indidən gələcək haqda danışmaq çətindi.
– Ümumiyyətlə, rəqabət sarıdan axsayan çempionatda oynamaq sıxıcı deyil?
– Elitaya çata bilməz, amma burda da mübariz komandalar var. Bəzi matçlar çox gərgin alınır. Uduzduğumuz, heç-heçə etdiyimiz oyunlar da olub. Hər görüşə məsuliyyətlə yanaşırıq.
Fanat.az
