“Hər iki komanda mübariz oyun sərgilədi. Məncə, baxımlı oyun alındı. Getdikcə oyunumuzu daha da inkişaf etdirəcəyik”.
Korner.az-ın məlumatına görə, bu sözləri “Zirə”nin baş məşqçisi Adil Şükürov Topaz Premyer Liqanın 31-ci turunda “Neftçi” ilə oyundan (0:0) sonra deyib.
Daha sonra o, jurnalistlərin suallarını cavablandırıb.
– “Zirə”nin futbolçularının yayda avrokuboklara qatılacaq klublara icarəyə veriləcəyi deyilir…
– Hər birimiz Azərbaycan futbolunun inkişafı üçün çalışırıq. Prezidentimiz də bu sözü deyərkən məhz bunu fikirləşib. Ancaq bu, o qədər də real deyil.
– İkinci hissədə “Zirə” sanki hücum etmək istəmirdi. Belə demək olar ki, “Zirə” bura heç-heçə üçün gəlmişdi?
– Bəli, ikinci hissədə bir qədər müdafiə futboluna üstünlük verdik. Ancaq bir xal barədə düşünmürdük. Bura qələbə üçün gəlmişdik.
– Fiziki yüklənmə sizi narahat etmir ki?
– Bu gün müdafiədə oynamağımız sırf taktika ilə bağlı idi. Yorğunluq yoxdur.
– Sizə elə gəlmir ki, Nurlan Novruzov son oyunlarda simulyasiya çox edir?
– Nurlanın xarakteri belədir. Oyun vaxtı tez-tez yıxılması çox vaxt yorğunluqla bağlı olur. Ancaq mən ona əvvəllər də demişəm ki, belə hallara az yol versin.
– Mövsüm boyu əziyyət çəkib, avrokuboklardan kənarda qalmaq sizə pis təsir etmir ki?
– Hələ 1 faiz də olsun şansımız var. Avrokuboklardan kənarda qalmağımızı düşünmək hələ ki tezdir. (qol.az)
