Belçika yığması ilə bağlı belə bir maraqlı nəzəriyyə var. Komandanın heyətində qəribə saç düzümlü futbolçular nə qədər çoxdusa, nəticə də ürəkaçan olmur. Əslində zarafat üçün irəli sürülən nəzəriyyə özünü doğrultmaqdadı.
İtaliya ilə oyunda Belçikanın heyətində Radja Nainqolan və Maruan Fellaini meydana əsas heyətdə çıxdı. Bu iki futbolçunun saç düzümü isə “gözoxşayır”. Oyunun gedişində Nainqolan meydanı tərk etdi, əvəzinə Oriqi oyuna qoşuldu. Nəticə isə məlumdu – 0:2. İkinci oyunda isə bu futbolçuların üçü də ehtiyatda qaldı, Nainqolan isə sonradan meydana daxil oldu. Nəticə – 3:0 hesablı qələbə. İsveçlə oyunda qəribə saçı olan sadəcə Radja meydanda top qovurdu. Bu nəzəriyyədə isə birdən çox qəribə saçlı futbolçu meydanda olursa, Belçikanın nəticəsi uğurlu olmur. Macarıstanla oyunda da hər şey təkrarlandı və yenə böyükhesablı qələbə – 4:0. Amma Uelslə oyundan qabaq Belçika əsas müdafiəçiləri – Vertonqen və Vermalendən məhrum oldu. Bu iki normal saçlı futbolçuların əvəzinə isə nəzəriyyəni doğruldan daha bir futbolçu Cordan Lukaku start heyətdə yer aldı. Əlavə olaraq, yenə də Nainqolan. İkinci hissədə isə Fellaini. Bu nəzəriyyəyə görə – saç düzümü lənətinə görə ikinci hissəyə baxmağa dəyməzdi
Belçika məğlubiyyətinin zarafatyana irəli sürülmüş nəzəriyyəsini bir kənara qoyub real səbəblərini araşdıraq. Bu səbəbləri belə qeyd edək
GÜNÜN ƏVƏZLƏNMƏSİ
Fasilədən sonra komandanın istedadlı futbolçusu Yannik-Fereyra Karaskonun əvəzinə meydana müdafiəyəmeyilli Maruan Fellaini daxil oldu. Hesab bərabər olan zaman Viltmos sürətli, texnikalı futbolçunu 5-ci müdafiəçi rolunda oynayan və hücumda yalnız başla yaxşı çıxış edən oyunçu ilə əvəz etdi. Düşünsək ki, Karaskonun zədəsi onu əvəzlənməsinə səbəb oldu, yenə də, Belçikada Dris Mertens kimi futbolçu vardı ki, o da Karasko ilə təxmini eyni xarakterli oyunçudu. Fellaini isə öz ənənəsinə sadiq qalıb, faciəvi oyun oynadı. Özünün yeganə şansı, başla fərqlənmək imkanını da qaçırdı
GÜNÜN XİLASI
Belçikalılar hesabda oyunun 7-ci dəqiqəsində önə keçməli idi. Yəqin ki, həmin epizod yadınızdadı. Öncə Azard ideal mövqedən topu qapıçının üzərinə vurdu. Daha sonra digər belçikalılar britaniyalı müdafiəçilərə tuş gəldi. Həmin epizod qolla nəticələnsə idi, matçda başqa ssenari ilə rastlaşa bilərdik.
OYUNUN BÖYÜK KAPİTANI
Əsl kapitan belə oynamalıdı. Rəqib cərimə meydançasına gələn Eşli Uilyams Remsinin ötürməsini qola çevirdi. Hesabı bərabərləşdirən Uels matça böyük ümidlərlə kökləndi.
GÜNÜN ZƏDƏSİ
Yan Vertongen meydanda olsaydı, ikinci qolun müəllifi Robson-Kanu çətinki onu Lukakuya etdiyi fintlə aldada bilərdi. Amma yenə də, Uels başqa yolla həmin epizodu qola çevirə bilərdi. Bundan başqa bu müdafiəçinin olmaması Belçika üçün böyük itki oldu.
GÜNÜN QƏHRƏMANI
Aron Remzinin milli komandası üçün bu matçda inanılmaz köməyi oldu. “Avro-2016” bir qol və 4 assistlə yadda qalan Remzi bu matçın gizli qəhrəmanı idi. İki dəqiq ötürmə edən Remzi sonda hər kəsi təəssüfləndirdi. “Arsenal”ın futbolçusu Portuqaliya ilə yarımfinal matçını aldığı sarı vərəqə epizoduna görə buraxacaq. Bu qarşılaşma isə Remzinin Avropa çempionatında son matçı ola bilər.
Belçikanın məğlubiyyət səbəblərini bir kənara qoyuv Uelsin göstərdiyi möhtəşəm xarakteri və oynadığı baxımlı futbolu qeyd etmək lazımdı. Komanda layiqli olaraq bu mərhələyə qədər gəlib.
İlkin Məmmədov
Korner.az
