Baş məşqçilərin qəribə qadağaları – Mourinyo, Pep, Klop…
04.05.2019 , 18:25
Futbol oynamaq kənardan çox asan görünə bilər. Meydana çıx, ötürmələr et, rəqib qapısına yaxınlaş və qol vur. Ancaq bu göründüyü qədər də asan iş deyil. Düzgün seçilmiş taktika, oyun planı və oyunçuların görüşlərə yaxşı köklənməsi uğurlu nəticə üçün çox lazımdır. Elə buna görə də, bəzi baş məşqçilər oyun və məşq zamanı futbolçulara bir çox qadağalar tətbiq edir. Bəziləri isə daha da irəli gedib, şəxsi həyata qarışırlar. Baş məşqçilər tərəfindən futbolçulara edilən bəzi qadağaları təqdim edirik:
Yurgen Klop – Almaniyalı çalışdırıcı “Liverpul” klubunun futbolçularına stadionun dəhlizində yerləşən “This is Anfield” yazısı olan tabloya əl vurmağı qadağan edib. Klopun buna açıqlaması isə belədir: “Oyunçularımın hər hansı ciddi bir uğuru olmayana qədər həmin tabloya əl vurmasını qadağan etmişəm. Məncə, bu hörmət nümunəsidir.”
Devid Moyez – Bir dönəm “Mançester Yunayted” klubuna baş məşqçilik edən şotlandiyalı mütəxəssis futbolçularına oyundan əvvəlki gecə kartof qızartması yeməyi qadağan etmişdi.
Aleksandr Zorniger – “Ştutqart” klubunun sabiq baş məşqçisi Aleksandr Zornigerin futbolçularına etdiyi qadağa isə digərlərindən bir qədər fərqlənir. Almaniya çalışdırıcı futbolçulara insanlar arasında olan zaman qulaqcıqdan istifadə etməyi qadağan etmişdi. Zorniger bu qadağaya belə izah verib: “Boyu 1.65-lik olan futbolçunun başı böyüklüyündə olan qulaqcıqdan istifadə etməsi axmaq bir görüntüyə səbəb olur.
Paola Di Kanyo – İtaliyalı çalışdırıcı Paola Di Kanyonun “Sanderland” klubunun futbolçularına qoyduğu qadağa isə bir növ ağır cəzaya bənzəyirdi. Belə ki, klub futbolçularına mayonez, ketçap, “Coca-cola”, mahnı oxumaq qadağan olunmuşdu.
Tomas Şaaf – Bir zamanlar “Verder Bremen” klubunda baş məşqçilik edən Tomas Şaaf futbolçulara döymə (tatu) etdirməyi qadağan etmişdi. Buna səbəb isə klubun futbolçularından birinin döymə etdirdikdən sonra qolunun zədələnməsidir.
Pep Qvardiola – İspaniyalı mütəxəssis Pep Qvardiolada futbolçulara bəzi qadağalar tətbiq edib. Hələ “Barselona” klubunda olan zaman Qvardiola futbolçulara məşqə lüks avtomobil ilə gəlməyi qadağan etmişdi. “Mançester Siti” klubuna gəldiyi ilk vaxtlarda isə klubun bazasındakı interneti ləğv etmişdi.
Joze Mourinyo – Futbolçularına qadağalar tətbiq edənlərindən biri də Joze Mourinyo olub. Portuqaliyalı baş məşqçi “Mançester Yunayted” ilə keçirdiyi ilk mövsümündə futbolçulara oyundan əvvəl 48 saat içərisində sosial şəbəkələrə girişi qadağan etmişdi. Bundan başqa Mourinyo məşq prosesindən olan görüntülərin paylaşılmasına qadağa qoymuşdu.
